Veire sautar una novèla marca dins lu domeni de la bici es forçadament un chause que compta, quante los novèus eissits son auvernhats quò compta per dos, e quante per dessús tot son tres per concebre e assemblar las bicicletas a Clarmont d’Auvèrnha, quò deven un quauquarés en defòra dau biais costumier.

L’istòria de la marca eponima, segon Vélotaf, se conta entau: “Nicolas, Christian e Sebastien amassèten lur saber-far e la lur experiéncia de la bicicleta per farjar Histoire Bike, la prumiera marca auvernhata de bicicleta per viatjar”, quò quí mai la volontat de balhar un gatge “especiau per las odissèas luenh-luenh coma per la rota de tots los jorns, un gatge que pòt respondre aus que damandan beucòp per de las aventuras modèrnas, qu’ilhs siguèssen esperinats o pas. De las gentas bicicletas, solidas, que laissaràn tombar degun e construchas dins lu respècte de la nòrma europèa EN14764”.
 
La prumiera bicicleta de la marca se pòt vieisar sus lu site liat n-en fin de bilhet. La “Granda Viatjosa Classica”, qu’es son chafre, es estada estudiada dins de las idèas de sobrietat dins lu dessenh mai jurtà quò que fau per far chic. Lu costat maliciós fuguèt pas obludat per aitant, per exemple lu quadre, la forcha e las ròdas son de bon reparar ente que quò fuguèsse sus la planeta, e adaptats mai quò que pòt s’i trobar; i a quitament un portaraijon de conhat dins lu quadre, per lu-cas-que-sabèm-jamai. Lu limerò 63 es lu dau Puei de Doma, qu’es maitot lu nombre de quadre produch n-en 2014, coma per far un omenatge a l’endrech ente sautèt la fabrica, qu’es maitot l’enchaison de gardar un uelh sus los prumiers eivís daus utilizaires, de las utilizairas maitot. Se balhèten entau una facilitat per analisar, e melhorar lurs bicicletas, las d’auei, las de deman. Veiquí de qué prener dau plaser a anar charchar lu pan a l’autre bot dau canton.
 
 
 
 
Jan-Peire Bertrand