Liza Séguéla es la pintora occitana que presentam uèi, demest los artistas occitans qu’ensajarem de vos far conéisser cada setmana. Definís son procediment coma “una caça al tresaur per l’observacion del mitan natural, que sa la tòca es de descobrir una a cha una las pèças qu’atrason mon agach per aviar mon imaginari”.
 
Séguéla trabalha amb de materials provesits per la natura, d’objèctes abandonats, rovilhats “amb una patina que lo temps sap donar plan ben”.
 
En integrar son imaginari a aqueles supòrts, los resultats son passionants. Sos tablèus son principalament realizats sus tela o fusta, amb l’ajuda de pigments naturals, de tencha, de pintura a l’òli o acrilica, de posca de marme, de gip e de mortièr sablat.
 
Comencèt en pintant de figuratiu, d’animals puèi de femnas, mas passèt a l’abstrach, e mai se, segon ela, foguèt “pas facil”. Mas dins l’abstrach Séguéla i tròba “una libertat d’escritura sens limits e sens barrièras”.
 
Liza Séguéla explica que “l’abstrach es una invitacion a sarrar los uèlhs per veire”, mas vos convidam a los dobrir amb l’enveja de trobar l’arma e l’expression d’aquesta pintora occitana.