E mai s’a ja perdut l’atencion dels mèdias, la vila curda de Kobanê resistís al sètge de l’Estat Islamic. Los durs atacs del movement jihadista an pas reüssit a ocupar completament la capitala d’una de las tres regions autonòmas del Curdistan occidental, gràcias a la resisténcia de las Unitats de Proteccion Populara (YPG) qu’an l’ajuda sul terren de qualques centenats de peshmèrgas del Curdistan meridional e de milicians de l’Armada Liura Siriana, e per aire gràcias als bombardaments de la coalicion internacionala contra las posicions de l’Estat Islamic.
 
La defensa de la vila, que se tròba devastada pels combats, contunha tres mèses puèi, e aquò se pòt constatar dins un reportatge interactiu qu’a publicat Le Monde. La reportaira Edith Bouvier e lo fotograf-jornalista Jake Simkin explican amb de tèxtes e de fòtos la vida dels refugiats qu’an fugit la vila, la vida dels diferents còrses de combatents que defendon la vila, de las cinc cents familhas que son tornadas...
 
Lo reportatge mòstra un imatge complet de la situacion actuala de Kobanê, que lo 70% n’es estat reconquistat contra l’Estat Islamic.