La plataforma Alsacians Reünits demandarà proteccion al Parlament Europèu e al Conselh d’Euròpa e reclama la celebracion d’un referendum en Alsàcia. De milièrs de personas participan a una manifestacion a Estrasborg contra la fusion amb Lorena e Champanha-Ardena.

Qualques milierats d’alsacians, opausats a la fusion de lor país dins una megaregion de l’Èst de França, manifestèron dissabte a Estrasborg e liurèron de signaturas per que las institucions europèas intervenguèsson dins lo conflicte. La protèsta amassèt entre 1600 manifestants (recompte de la polícia) e 8000 (organizacion) davant lo sèti del Parlament Europèu dins la capitala alsaciana.
 
Pendent las setmanas anterioras, d’autras vilas d’Alsàcia avián aculhit divèrsas protèstas similaras.
 
Los manifestants refusan la nòva mapa de las regions, aprovada per l’Assemblada Estatala francesa, qu’a previst de fusionar Alsàcia amb Lorena e Champanha-Ardena dins una granda region de l’Èst, que s’estendrà d’Estrasborg a practicament las pòrtas de París.
 
La fusion tanben es refusada pel conselh regional d’Alsàcia e pels conselhs generals del Bas Ren e del Naut Ren. Lo president d’aquel darrièr, Charles Buttner, cridèt ièr dimècres los cònsols del sieu territòri a far sonar de claxons e d’alarmas coma senhal de protèsta contra la fusion.
 
La granda region de l’Èst fariá desaparéisser lo conselh regional d’Alsàcia e daissariá l’1,85 milion d’alsacians en minoritat dins d’una nòva jurisdiccion de 5,5 milions d’abitants. Barrariá tanben las pòrtas a la creacion d’una collectivitat unica en Alsàcia que balhèsse al territòri mai d’autonomia.
 
 
Recors a Euròpa
 
A la fin de la manifestacion, la plataforma Alsacians Reünits (Alsaciens Réunis) liurèt a l’eurodeputada alsaciana Anne Sander (UMP-PPE) un recuèlh de 15 500 signaturas en demandant la convocacion d’un referendum en Alsàcia sus la fusion. Alsacians Reünits anoncièt que tanben mandariá las signaturas al Conselh d’Euròpa. La plataforma interprèta que l’article 5 de la Carta Europèa de l’Autonomia Locala, ratificada per França, empara lor peticion. L’article ditz que “tota modificacion dels limits territorials locals” se deu far a partir d’una consulta prèvia “amb las collectivitats localas”, “eventualament per via d’un referendum ont la lei o permeta”.
 
Buttner reculhiguèt la demanda d’Alsacians Reünits e anoncièt que presentariá “plan lèu” una mocion al conselh regional d’Alsàcia per la celebracion “d’un referendum o consulta” per fin de conéisser l’opinion dels alsacians sus la fusion. Mas la convocacion del vòte seriá competéncia de París.
 
 
 
 
 
 
Aqueste article es adaptat de Nationalia amb qui Jornalet a un acòrdi de cooperacion.