Cent quaranta-quatre mòrts —dont cent trenta-tres son d’enfants— es lo bilanç de l’atac d’un comando de talibans ièr de matin dins una escòla de Peshawar, en Paquistan. Dins l’escòla, i aviá aperaquí cinc cents estudiants e professors al moment de l’assaut menat per qualques sièis òmes armats, segon çò qu’an explicat de fonts oficialas. Los atacaires intrèron dins l’encencha e comencèron de tirar contra los enfants e los professors que trobavan sul camin. L’armada paquistanesa intervenguèt sul pic e, aital, una fusilhada comencèt entre los talibans e los soldats. Segon de mèdias paquistaneses, los assalhidors retenguèron qualques escolans e professors.
 
Los talibans avián mandat un comunicat per revendicar l’atac. I disián qu’avián donat d’òrdres als membres del comando de non pas ferir los enfants e d’atacar solament lo personal militar que gerís l’escòla.
 
Se tracta d’una escòla per d’enfants de militars. Lo primièr ministre paquistanés, Nawaz Sharif, condemnèt l’atemptat e se desplacèt a Peshawar per supervisar personalament l’operacion de l’armada.