Guilhèm Delon es un pintor occitan e occitanofòn. Narbonés d’origina, demòra a Aush dempuèi longtemps. Li avèm demandat qual es per el lo ligam entre l’occitan e la pintura e nos a dich qu’o sap “pas tròp, una de las causas es segurament la lutz de mon país.” Sa primièra pintura aviá de títols escriches en occitan sus la tela, mas Delon definís aquel trabalh coma “intellectual”. “Amb lo temps mon biais de veire lo Mond a cambiat”, çò ditz. A l’ora d’ara Delon se compara al trabalh de pintors americans coma Edward Hopper o John Singer Sargent o dels franceses Manet o Monet.
 
Guilhèm Delon es tornat a la pintura figurativa: “per çò que pòdi trapar a l’entorn de ieu e d’en pertot, tot çò que me cal: lutz, colors, vida e subretot lo movement de las gents”, çò ditz. Es aquí que vesèm lo ligam amb lo país: “M’agrada ben de trabalhar la nòstra vida, las carrièras, los endreits ont anam, ont viatjam (estacions, aeropòrts…) ont manjam (estanquets, restaurants…), los endreits ont las gents bolegan. M’agrada de pensar que, quora se gaita una de las mieunas telas, se pòt sentir o ausir la scèna (los movements, las paraulas, lo vent o la pluèja, las veituras que bronzinan…). Tanben m’agrada de plantar o fixar amb de pintura, acrilica o d’òli, la modernitat de las arquitecturas (coma las aeropòts —Blanhac de segur—).  En brèu e per acabar, m’agrada de representar las causas anodinas que prenèm pas lo temps de gaitar”.
 
 
 
 
_____
— Sit web de Guilhèm Delon
— Sus l’espaci virtual d’exposicions Icidexpos
— Sul blòg de l’artista estatsunidenc Douglas Moorezart