Lo Parlament d’Ucraïna (ont lo Partit de las Regions, qu’es russista, a la majoritat absoluda) aprovèt una lei fòrça controvertida qu’autreja l’estatut de lenga oficiala al rus, segon çò qu’expliquèt Reuters dempuèi Kyiiv lo 5 de junh passat. La lei es criticada frontalament de la part dels partits de l’oposicion, que considèran que donar l’oficialitat al rus autrejarà al Cremlin mai d’influéncia sus Ucraïna e aurà un impacte negatiu sus la lenga ucraïnesa.
 
Se la lei es aprovada (cal un segond torn de votacions ongan), lo rus serà oficial dins 13 províncias, aquelas ont almens 10% de la populacion l’a coma lenga mairala. Totas aquelas províncias son plaçadas dins las regions orientalas e meridionalas d’Ucraïna e comprenon las vilas mai pobladas de l’èx-republica sovietica.