Emilie Saurel es una artista pintora galhagòla, diplomada d’una licéncia d’arts plasticas e d’un CAPES, qu’a recebuts los prèmis de nombroses concorses. A expausat sas telas al Parlament Europèu, invidata pel vicepresident de l’Eurocambra, al Musèu Urban Cabròl de Vilafranca de Roergue e al Musèu de las Bèlas Arts de Galhac. Al delà, sas telas son passadas per las galariás Daniel Vignal a Tolosa, la Galariá dau Sens Interior (Galerie Sens Intérieur) a Sant Tropetz, la Galariá de la Galariá de la Chantrariá a Caors, etc.
 
Saurel abòrda lo tèma del còrs d’una faiçon singulara. Son encaminament unic, qu’utiliza los dos costats de la tela, presenta jos forma d’installacion aquela pèl, aquela superfícia tenduda que transpira d’un costat per ne revelar un autre. Las gotas de pintura a l’acrilic o a la tempera imprègnan lo teissut encarnat.
 
Son trabalh permet a l’espectador de cabussar dins la matèria. De còps la figura s’escafa, quita de se daissar veire entre abstraccion e figuracion. Dins çò qu’ela apèla “un incessant jòc de seduccion”, lo còrs, imatge projectat e renviat pel miralh, permet de jogar sus diferentas identitats. “S’agís, doncas, d’aprene l’òme a travèrs de son envolopa”.