Actualitats
Santa Coloma de Brulhés: una nòva ZAD en Occitània
Los zadistas, cridats pel proprietari de las tèrras, luchan contra un projècte de zòna industriala restacada a la linha de tren de granda velocitat (LGV) Bordèu-Tolosa
Dins l’estat francés i a quatre ZADs, o “zònas a defendre”, emblematicas de la lucha contra los grands projèctes d’amainatjament. Demest aqueles quatre airals de protèsta, resisténcia e revendicacion, un es en Bretanha (Kernitron al Lann) e un autre en Arpitània (Roybon). En Occitània, i a la ja celèbra ZAD de Sivens, que ièr encara visquèt una protèsta dels païsans de l’endrech qu’i anèron en tractors en marcha lenta, e qu’aperabans costèt la vida del jove estudiant de botanica tolosan Rémi Fraisse. Al delà, ven de nàisser una nòva ZAD en Santa Colomba de Brulhés. Ne parla Libération dins sa sèria de reportatges sus las ZADs de França.
La zòna a defendre (ZAD) de Santa Coloma de Brulhés, a dètz quilomètres d’Agen, nasquèt a l’iniciativa de Joseph Bonotto, un agricultor a la retirada que demandèt ajuda als zadistas per defendre sas tèrras que seràn impactadas per un projècte de zòna industriala restacada a la linha de tren de granda velocitat (LGV) Bordèu-Tolosa. Lo projècte ocuparà un vintenat d’ectaras e un vintenat d’abitacions riscan de desaparéisser jol betum.
En riscant l’expropiacion de sas tèrras, declaradas per l’estat d’utilitat publica, l’èx-agricultor brulhés se reüniguèt amb l’associacion marselhesa Filièra Païsana (Filière Paysanne). Dissabte passat se convoquèt una reünion sus las tèrras afectadas que los presents decidiguèron de la declarar “zòna a defendre”. Fòrça abitants del parçan portèron de vitalhas e de material de construccion als novèls zadistas, qu’an ja bastit dos tipis per albergar un desenat de personas cadun, un luòc de vida e un òrt collectiu.
A l’ora d’ara un seissantenat d’activistas luchan amb Bonotto per defendre sas tèrras del betum, dins una nòva ZAD qu’a las simpatias dels vesins; dissabte passat sopèron al sit aperaquí 150 personas.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#5 "si ne s'i pòt pas hèser de criticas, a Jornalet, milhor seré de barrar los comentaris un còp per tot". Mes que'us pòts escríver liurament, los tons comentaris plens de maishanta fe.
#9 "Es per aquò que per far cagar la CAA e sol pretexta de consevar de terras agricòlas faguet venir de sa pròpa iniciativa de zadistas per lo defendre ." Aquò rai, que son las tèrras qui cau defénder, non aqueth agricultor. Se ua dinamica e's hica en plaça, que serà lèu despassat. Au mensh, qu'ac espèri.
#8 Encantat! ;-)
Bon ara ai un pauc mai de temp per developar çò qu'ai escrit aqueste matin avan de partir al mercat.
Los que me coneisan saban que soi agricultor dins l'agenes e que coneissi un pauc aquel òme (Bonotto) .
Prumerament es pas per la LGV que deu estre expròpriat de 4 ectaras mas per la creacion d'una zòna industriala de las novelas nòrmas environamentalas perque totas las autras zònas de l'agenes son saturas e que la CAA (Comunautat d'Aglomercion Agenesa) a causit de metre tot de son costat per far venir d'entrepresas e atal desvelopar lo paìs.
I a ja de temps qu'aquel agricultor vend de pitchons bocins de terra coma terrens a bastir mas aqueste còp avià coma projecte de far un lotisòment e esperava n'en tirar al mens 300000€ per el ( Per la pitchona istòri vos cal saber qu'aquel agricultor a mai d'un ostal que met en locacion e qu'a quitamen son pròpa terren d'ULM aquò per dire qu'es pas qualqu'un dins lo beson.) Donca quan la CAA li prepauset coma als autres proprietaris de li pagar sos terrens a 43000€/ectara ,172000€ en tot trobet que n'avia pas pron,n'en volià mai . L'ectara de terra agricòla a aquel endret val entre 8000 e 10000€.
Es per aquò que per far cagar la CAA e sol pretexta de consevar de terras agricòlas faguet venir de sa pròpa iniciativa de zadistas per lo defendre .
Es per aquò que disi qu'es pas per far creisse de pastanargas que Faguet venir los zadistas mas per n'en tirar lo mai d'argent. Vaquì lo fon de l'afar,de monedas,totjorn mai de monedas!!
#5 pjm = peir joan masdiset, pseudonim anti googlizacion intempestiva, mès pasmens perfectament identificable, podetz quitament trobar mon mus si cercatz.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari