Libertat a ganhat lo procès. Lo jutge de proximitat anullèt ièr la procedura contra un representant del movement revolucionari occitan a Pau, segon çò que rapòrta La République des Pyrenées. Lo jutjament foguèt reportat lo 17 d’octòbre fins al 19 de decembre, pr’amor que l’acusat decidiguèt de parlar solament en occitan. Ièr lo jutge tornèt refusar l’emplec d’un interprèt de la lenga del país, e l’acusat, doncas, aguèt pas drech a la paraula. Pasmens escotèt l’avocat que, dins la lenga de l’estat, li expliquèt las irregularitats d’aquel procès, que demandava una multa de 1238 èuros pels faches de la Fèsta de la Musica del 21 de junh passat.
 
Segon lo representant de Libertat, “i a encara un acarnament”. Diluns que ven el se deurà explicar al comissariat sus un prospècte defendent las Calandretas, ont se qualificava lo prefècte del departament de “persona mespresabla, qui ageish de manièra desleiau”. Aquela campanha seguissiá la menaça de barrar la Calandreta d’Artics (Bearn) e la manifestacion de sosten a l’escòla occitana que se passèt a Pau en febrièr passat.
 
 
Secutament policièr
 
Fa qualques meses que lo movement occitan d’esquèrra revolucionària patís una ofensiva policièra sens precedents. De militants son estats convocats cinc còps per la polícia, en mai del que serà jutjat. Acusan la comuna de Pau e las autoritats departamentalas de cercar, e quitament de provocar, los mendres pretèxtes per barrar la Tor deu Borrèu, al quartièr del Hedars, a Pau (Bearn), qu’es lo local social de Libertat.
 
De fach, lo 21 de junh passat, la Fèsta de la Musica s’acabèt ailà amb de susmautas. La polícia metèt fin d’una faiçon plan violenta als concèrts que s’i debanavan. Aquela accion policièra, segon la còla de Libertat, poiriá èsser premeditada per criminalizar l’esquèrra occitanista. Segon la version oficiala, la polícia demandèt d’arrestar los concèrts a 1 ora, e a 2 oras un trentenat de policièrs intervenguèron per metre fin a la fèsta. Mas segon la version de l’organizacion, de policièrs de divèrses còrses (municipala, nacionala, CRS e BAC) faguèron irrupcion quand lo darrièr grop acabava de jogar, en tustar lo material dels grops, en ensajant aital d’aturar la musica e en lançant de gases lacrimogèns e de flashballs abans que lo mond reagiguèsson. Lo mond respondèron sul pic a l’agression e se descadenèt la violéncia. Aqueles escambis violents s’acabèron amb la preson ferma per doas personas e amb de sosta per doas autras.