La societat chinesa HKND ven de començar aquesta setmana la construccion d’un pòrt provisòri al bocal del riu Brito, a la còsta pacifica de Nicaragüa. Aquela òbra es una petita part d’un projècte colossal: un canal interoceanic que deu jónher l’Atlantic e lo Pacific pel mièg de Nicaragüa, amb lo sosten decidit del govèrn del Front Sandinista, segon çò que rapòrta Vilaweb.

La societat chinesa HKND ven de començar de bastir un canal entre los oceans Atlantic e Pacific que traversarà Nicaragüa. Per bastir los 278 quilomètres del canal, tres còps mai long que lo de Panamà, caldrà cinquanta mila obrièrs sul terren almens pendent cinc ans, e los plans comprenon dos pòrts, una linha de tren e un aeropòrt, un oleoducte, un lac artificial, una zòna de liure escambi e un complèxe toristic, en mai de fabricas d’acièr e de ciment, d’estradas... Sputnik n’a publicat una infografia fòrça detalhada.
 
Segon las previsions del consòrci chinés HKND, caldrà remenar entre 4,5 e 5 millions de mètres cubes de tèrra amb un còst total de 50 miliards de dolars. Pel govèrn de Daniel Ortega, aquel trabalh colossal portarà fòrça beneficis economics al país e l’ajudarà a metre fin a la pauretat extrèma e al caumatge.
 
Mas dempuèi que s’anoncièt lo projècte, en junh de 2013, lo grand canal de Nicaragüa a generat tanben fòrça dobtes. D’un costat se met en question la pauca experiéncia de Wang Jing, lo desconegut òme d’afars que baileja HKND, en de projèctes d’aquela sòrta. Cal dire que l’infrastructura es una escomesa per l’engenhariá, pas sonque per las dimensions, mas tanben per la situacion geografica: lo canal se bastirà dins un dels païses del Mond mai afectats per de fenomèns idrometeorologics e sismics. Nicaragüa es propici als tèrratrems, tsunamis, ciclòns, secaresas, inondacions e erupcions volcanicas, e pr’amor d’aquò los Estats Units negligiguèron fa un sègle d’i bastir un canal interoceanic que faguèron fin finala en Panamà. Segon de donadas de l’Institut Nicaragüenc d’Estudis Territorials (Ineter), en un pauc mai d’un sègle lo país es estat tocat per un seissantenat de ciclòns e dos grands auragans coma Roxanne (1995) e Mitch (1998), que causèron de milièrs de victimas e de grandas pèrdas materialas. En mai d’aquò, cada an s’i compta pas mens de dos mila tèrratrems e i a tretze volcans actius.
 
Las protèstas se concentran tanben sus las consequéncias de la granda òbra sus la populacion locala e l’environament, coma lo Grand Lac de Nicaragüa. Los residents de la zòna per la quala passarà lo canal an paur dels efièches negatius restacats a la concession de las tèrras del govèrn a la societat HKND, que segon lo contracte, HKND pòt ocupar las tèrras pendent cinquanta ans e prorogar aquela ocupacion cinquanta ans de mai.


Oposicion de las minoritats nacionalas
 
Qualques minoritats nacionalas del país considèran que lo govèrn las a pas pres en compte, segon çò que rapòrta Nationalia. En 2013, de representants de las nacions miskitu e ulwa, dels kriols de Bluefields e del govèrn indigèna de rama-kriol, presentèron un recors d’inconstitucionalitat davant la Cort Suprèma del país. Segon eles, la Lei 840, que permet la construccion del grand canal, viòla los dreches de proprietat e ocupacion dels indigènas sus lors tèrras e lor accès a las ressorsas naturalas. Lo recors foguèt refusat.
 
Aquela Lei 840 establís que l’expropriacion de las tèrras o dels dreches serà legala s’es necessària per realizar lo Canal de Nicaragüa, e mai se los proprietaris de las tèrras son las comunautats indigènas.