Lo conselh municipau de diluns passat estot marcat per una peleja verbala peluda entre los dus enemics de tostemps. L'avocat verd Jacques Respaud reprochèt au conse la soa part de responsabilitat dens los sheis accidents mortaus que's debanèren en mensh d'un an. Shens gaire precision, ça que la: "Celà oblige à se poser des questions et à poser les questions de notre responsabilité. Il ne s'agit pas de dire que c'est le maire de Bordeaux qui... mais quand même, vous avez un certain nombre de pouvoirs vous aussi", ce lancèt M. Respaud au conse. Aqueths perpaus marquèren la debuta d'una èrsa de protestacions de la dreta, deus adjunts e de M. Juppé. Arrautjat, Jean Louis David (adjunt a la politica de proximitat) se livèt e s'aprochèt deu sèti de M. Respaud, per exprimir dab grands gèstes son desacòrd. Dens lo brut e la confusion, M. Respaud podot pas acabar son intervencion.

 

 

Delà de l'espectacle politic, pòt semblar complicat de cargar la comuna de la responsabilitat dens aqueths ahars. Mès es totun curiosa la coincidéncia entre los accidents de Garona (que se son multiplicats a Bordèu per aqueths torns, acompanhats de rumors variadas, de l'existéncia d'un "serial-possaire" o d'un hialat de trafic d'organas) e la volontat de desplaçar lo còr sociau hòra deus lòcs tradicionaus. Barraduras d'estanquets, de la espiçarias après 22h, repression contra los establissaments de nuit e mei globalament una politica d'ostilitat a l'activitat nocturna an desplaçat cap aus cais de Garona las poblacions de jovens, de hestaires o de noctambulas. L'amainatjament deu lòc, dab pelosas e camps d'espòrts, apera de hèit aquera vita navèra, après lo silenci deus entrepòsts abandonats pendent detzenas d'annadas. Mès l'alcoolizacion, s'es estada desplaçada hòra deus estanquets tradicionaus, n'a pas desapareishut. Dempuish mantun mes, los auvaris se seguissen, shens digun trapi nada solucion mei que la repression. Totun, farrà benlèu espiar alhors per prevenir los accidents. Susquetot, voler empachar partidas importantas de la poblacion de sortir, o de miar lor existéncia sociala com e ont l'entenden, ne pòt pas estar un projècte de civilizacion coerent. Parcar lo pòble de la nuit en parçans eslunhats deu centre (mei que mei en parçans que's pòden amuishar dangeirós, com ic son los cais de Garona), aquò n'es pas una solucion. Los responsables politics d'en pertot s'ic auràn de soscar lèu-lèu.

(vidèo a comptar de 5,46 min)

 

 

 

 

Pèir-Joan Masdiset