Lo cantaire britanic Joe Cocker moriguèt ièr a 70 ans dins son ostal en Colorado (Estats Units), “après una dura batalha contra un càncer del palmon”, segon çò que diguèt un comunicat de Sony Music, que confirmèt lo decès. Èra considerat una de las melhoras voses del blues e del soul, mai que mai per sa particulara votz rauquilhosa.
 
Cocker venguèt famós a la fin dels ans 1960 amb sa version d’una cançon dels Beatles, Whith a little help from my friends. Precisament es amb aquela cançon que sonèt al famós festenal de Woodstock en 1969. Quant aviá 20 ans, comencèt sa carrièra internacionala coma cantaire de blues e de rock amb diferents grops.
 
Demest sas cançons mai conegudas i a You are so beautiful, Unchain my heart e tanben You can leave your hat on del filme Nine 1/2 Weeks e mai Up where we belong del filme Officer and gentleman. Aquesta darrièra cançon ganhèt un Oscar e un Glòbe d’Aur per la melhora benda sonora originala.
 
Enregistrèt 40 disques e faguèt de nombrosas tornadas per lo Mond.
 
 
Tribut de Ringo Starr
 
Après saber la trista nòva, lo musician e èx-bateire dels Beatles, Ringo Starr, a publicat un messatge sus Twitter en disent: “Adieu, e que Dieu benesisca Joe Cocker, de part d’un dels sieus amics. Patz e amor.”