Se presentèt diluns passat a Vielha (Val d’Aran) una aplicacion per telefòn mobil, nomenada Eth Holet, per descobrir los secrets de l’environament. Aquela aplicacion, desvolopada dins l’encastre del programa Sud’Eau 2, a la tòca de far prene consciéncia a la populacion de l’importància de la preservacion de l’aiga e dels rius.
 
Eth Holet es disponible en occitan, catalan e espanhòl e fonciona per Android e HTML5 e dins un mes serà disponibla per IOS. L’usatgièr es menat per un folet (holet en gascon) per divèrses itineraris de l’environament natural e aqüatic de la Val d’Aran. S’agís d’un esplech de conscientizacion ambientala que promòu la participacion dels ciutadans, que pòdon crear d’itineraris nòus e los inclure dins lo sistèma.
 
Dins la presentacion, lo cònsol de Vielha, Àlex Moga, expliquèt qu’“aguesta aplicacion conten siés itineraris guidadi per GPS e ei era prumèra que se hè d’aguest estil ena Val d’Aran”. “Eth resultat finau ei fòrça professionau e entre toti la haram a créisher entà que sigue un referent e util entàs senderistes, e tanben entà hèr conéisher entre eth public generau punts d’interès deth miei naturau deth nòste municipi”, çò apondèt l’elegit aranés.