Intrèt ièr en vigor lo primièr Tractat Internacional sul Comèrci d’Armas Convencionalas, que l’Assemblada Generala de l’ÒNU l’aprovèt lo 2 d’abril de 2013. L’acòrdi deviá intrar en vigor 90 jorns après que lo signèsson e lo ratifiquèsson almens 50 dels 130 estats que lo votèron. Es ara que se son complidas aquelas condicions.
 
Lo tractat representa una granda victòria per las ONG que pendent mai de dètz ans mobilizèron l’opinion publica internacionala. Lo comèrci d’armas convencionalas mòu aperaquí 70 miliards de dolars per an.
 
Demièg los 130 estats qu’an signat l’acòrdi, i a qualques unes dels principals exportaires d’armas del Mond: Alemanha, França, lo Reialme Unit o Espanha. L’acòrdi permetrà de portar als tribunals aqueles païses qu’ajan signat lo tèxt e que vendan d’armas en de luòcs ont s’alèba lo drech umanitari internacional. Los Estats Units an signat lo tractat mas l’an pas ratificat encara. Russia e China an solament pas signat.
 
 
La tòca d’aquel tractat es d’establir de nòrmas mondialas per un comèrci responsable de las armas. Lo tractat enebís pas cap de tipe d’arma, mas ne regula los transferiments per fin d’evitar, dins lo païses que las pòscan emplegar, qu’arriben per la repression intèrna o per d’agressions contra d’autres estats. Aital, deu contribuir a promòure la patz e la seguretat internacionalas, lo desvolopament sòcioeconomic e lo respècte dels dreches umans.
 
Es un tractat qu’englòba totas las armas convencionalas: las pichonas e leugièras, responsablas de la màger part de la violéncia armada que se produtz cada jorn dins lo Mond; e las pesantas, coma los avions o los tancs, que mòvon fòrça sòus e que son aquelas que las pren en compte l’annuari de l’Institut Internacional per la Recèrca de la Patz d’Estocòlme (SIPRI) per fin d’elaborar las listas dels principals productors, exportaires e importaires d’armas.