La tradicionala partida de Calendas de la seleccion catalana de fotbòl se debanèt aquesta dimenjada contra la seleccion basca, en tot festejar lo 100n anniversari de la primièra competicion entre las doas esquipas nacionalas. Los esportius bascos de fotbòl aculhiguèron los catalans ièr de ser a l’Estadi San Mamés a Bilbao. La partida s’acabèt egalizada 1-1.
 
L’Athletic de Bilbao es l’esquipa que mai de jogaires pòrta a la seleccion basca: dètz. La Reiala Societat ne pòrta sièis, Eibar cinc e Osasuna un.
 
Del costat catalan, nòu jogaires èran de l’FC Barcelona, quatre de l’RCD Espanhòl e un de Vila-Real. Al delà, d’esquipas coma lo Celta, Granada, Sevilha, Getafe, lo Salzborg austrian e quitament la Reiala Societat basca, an cedit un jogaire catalan caduna.
 
 
De fotbòl femenin, de fotbòl en sala e de rugbi
 
Mas en mai del fotbòl masculin, lo Bascoat e Catalonha s’afrontèron en rugbi, fotbòl femenin e fotbòl en sala masculin. Las seleccions femeninas de fotbòl egalizèron a 1 jos la pluèja a Barakaldo. Per quant al fotbòl masculin en sala, ganhèron los catalans 3 a 6 a Santurtzi. Per çò qu’es del rugbi, lo terren barcelonin de La Foixarda aculhiguèt lo rescontre de las doas seleccions, amb un resultat de 33-38 favorable als bascos.
 
 
Reünion dels presidents de govèrn
 
Dins una amassada prèvia a la partida de fotbòl, lo president del Bascoat Iñigo Urkullu e lo president de Catalonha Artur Mas se rescontrèron ièr dins lo palais d’Ajuria Enea, sèti del govèrn autonòm basco.
 
Dins l’encastre d’una reünion de trabalh, lo president catalan expliquèt al basco lo procès democratic catalan devèrs l’independéncia. De mai, los dos presidents parlèron de la situacion economica e politica e de la crisi institucionala del modèl d’estat que, segon totes dos, es de mai en mai grèva dins l’estat espanhòl. Urkullu e Mas s’acordèron per trabalhar amassa e per afrontar aquel procès, en respectant los autogovèrns respectius.