Pel primièr còp, lo sondatge del Centre d’Estudis d’Opinion mòstra que mai de 51% de totes los ciutadans de la comunitat autonòma de Catalonha votarián per l’independéncia se deman i aguèsse un referendum; 21% votarián contra e 21,1% s’abstendrián. Se prenèm en compte los vòtes “òc” o “non”, 70,8% votarián òc per l’independéncia del temps que los unionistas pròespanhòls serián mens de 30%. En un an, los partidaris de l’independéncia an pujat gaireben de 10%.
 
En mai d’aquò, se Catalonha foguèsse un estat independent, 55,5% pensan que lo nivèl de vida dels catalans seriá melhor; 16,7% que cambiariá pas res, e 12,8% que seriá pièger.
 
A prepaus de l’identitat dels catalans, 52,9% se declaran “solament catalans” o “mai catalans qu’espanhòls”, del temps que los que se sentisson “tan catalans coma espanhòls” son 37,3% (5% de mens que fa tres meses). Lo mond que se sentisson “solament espanhòls” o “mai espanhòls que catalans” montan tanplan un pauc, ara son 7,5% e en març èran 5,8%.
 
Los independentistas son majoritaris entre los votants de la màger part dels partits del Parlament de Catalonha (64,5% dels votants de CiU,  95,7% dels d’ERC; 53,2% dels d’ICV-EUiA e 99,1% dels de Solidaritat). Çò mai significatiu es que 29,1% de votants del Partit Socialista votarián tanplan per l’independéncia. Quitament, 15,3% dels votants del partit espanholista Ciutadans votarián per la secession, del temps que 8,8% del mond que vòtan per lo Partit Popular votarián tanben per l’independéncia.