Pas de president elegit

Lo Parlament de Grècia deviá elegir lo novèl president de la republica, qu’es lo cap de l’estat e que ten un ròtle limitat, mentre que lo poder essencial es en mans del primièr ministre. Los deputats del Parlament son pas arribats a la majoritat exigida per causir un president, malgrat tres torns de vòte (primièr e segond torns los 17 e 23 de decembre amb una majoritat non obtenguda de 200 vòtes sus 300, tresen torn lo 29 de decembre amb una majoritat non obtenguda de 180 vòtes sus 300).
 
En aquel tipe de cas, la constitucion grèga prevei de dissòlver lo Parlament e d’organizar d’eleccions legislativas anticipadas, que ne sortirà un Parlament renovat, e aquel deurà elegir un president de la republica, mas aqueste còp una majoritat absoluda sufirà (151 vòtes sus 300).
 
Aquela constitucion exigenta, installada en 1975, a la tòca de garentir un mandat incontestable del pòble e vòl evitar lo retorn d’una dictatura coma la del Regim dels Coronèls, qu’oprimiguèt Grècia de 1967 a 1974.
 
 
Una crisi que devasta lo país
 
Ara, dempuèi que la crisi economica a esclatat en 2008, los govèrns grècs successius an acceptat d’aplicar de mesuras drasticas d’austeritat exigidas per los organismes internacionals, en escambi d’una sèria de prèstes enòrmes qu’empachan Grècia de far quicanèla. Los tres organismes internacionals que prèstan l’argent se coordenan dins una “tròica”: son la Comission Europèa (de l’UE), la Banca Centrala Europèa (BCE) e lo Fons Monetari Internacional (FMI).

Los govèrns grècs qu’obesisson a la tròica son dominats per los dos pus grands partits del país: la Nòva Democracia (ND), qu’es de drecha e qu’es al poder ara, e lo PASOK, qu’es de centresquèrra e que sosten aquel govèrn de drecha. Lo PASOK coneis uèi una casuda vertiginosa al près dels elegeires.
 
Las mesuras d’austeritat, dictadas per la tròica, an pres lo nom de “memorandum”. An pas capitat a sortir Grècia de la crisi e la vida vidanta de la populacion a empejorat: caumatge massís al 27%, casuda dels salaris, desparicion de fòrça servicis publics, apauriment, malnutricion e malautiás non sonhadas, licenciaments brutals, drech del trabalh demenit, suicidis en aumentacion, entrepresas barradas o vendudas al capital estrangièr, una delinquéncia endemica que los grècs coneissián pas gaire abans 2008, creissença del partit neofaissista Chrysi Avgi (“Alba Daurada”)...
 
 
La recenta pojada de l’esquèrra radicala
 
A las darrièras eleccions legislativas de 2012, l’ND e lo PASOK an gardat lo poder amb dificultat mas lor politica d’austeritat a rescontrat una impopularitat enòrma. Lo partit Syriza, que se vòl de l’esquèrra radicala, a obtengut de resultats fòrça elevats. Un fum d’elegeires del PASOK ara vòtan per Syriza.
 
Ara, las eleccions legislativas anticipadas auràn luòc lo 25 de genièr. Los sondatges anóncian una victòria probabla de Syriza aqueste còp. Seriá lo primièr còp qu’un movement francament d’esquèrra accediriá al poder en Grècia.
 
Syriza a anonciat dins son programa que vòl impausar a la tròica una renegociacion ferma dels prèstes e la fin de la politica d’austeritat. Syriza precisa totun que vòl manténer Grècia dins l’Union Europèa e la Zòna Èuro. Lo lidèr de Syriza, lo jove deputat Alexis Tsipras, poiriá devenir lo novèl primier ministre. Per tant, Tsipras s’afana per se donar un imatge rassegurant cap als elegeires qu’esitan encara de votar per el.


Pressions contra Syriza
 
Los partits tradicionals, l’ND e lo PASOK, sostenguts per certans jornalistas e per la Comission Europèa, afirman que lo futur seriá apocaliptic se per cas Syriza arribèsse al poder. L’actual primièr ministre, Antonis Samaras, de l’ND, multiplica las prediccions sornas e assaja de jogar sus la paur dels elegeires indecises.

La borsa d’Atenas, ièr, coneguèt una baissa subita d’un 11%. D’autras borsas europèas tanben baissèron. E l’FMI anoncièt tanben ièr que congelava l’enviament d’ajuda financièra en tot esperar quina situacion politica resultariá de las eleccions. L’FMI a avertit que l’ajuda s’aturarà se s’aplica pas las reformas exigidas per la tròica.
 
A l’esquèrra del panorama politic, lo vièlh Partit Comunista Grèc (KKE) cèssa pas de dire que se mesfisa de Syriza e que li vòl pas acordar d’aliança ni de sosten. Cal dire que lo KKE supòrta pas lo succès recent de Syriza, que Syriza es nascut d’una scission del KKE dins los ans 1990.
 
En marge de Syriza, de partits pus pichons, venent de tendéncias plan divèrsas, espèran tanben d’emergir amb de resultats interessants.
 
 
Intencions de vòte
 
Un sondatge del 28 de decembre (Palmos/TVXS) prevei las intencions de vòte seguentas:
 
1. Intrada probabla al Parlament
   
2. Intrada pauc probabla al Parlament (per aver de deputats, cal obténer lo 3%)
   
3. Divèrses