Comença una nòva annada dins l’Union Europèa amb l’accent baltic. La Zòna Èuro aculhís Lituània del temps que Letònia pren la presidéncia de l’Union per sièis meses.
Dins una epòca que las cartas de crèdit van a fum, sembla que siam ja abituats a experimentar cada 1r de genièr las pojadas dels prèses del transpòrt public, la pòsta, lo tabat, las taxas suls carburants...
Dins l’estat francés
Despareis la taxa del 75% pels revenguts de mai d’un milion d’èuros. Lo gasòli puèja de 0,02 èuro per litre, que s’agís sonque de taxas; en 2014 lo brent a baissat del 50% dins l’annada 2014. Tanben pojarà lo gas.
Puèja lo prètz de l’electricitat del 2,5%. Se cal remembrar qu’al mes de novembre de 2014 aviá ja aumentat d’un 2,5% per lo finançament de la energias renovelablas.
Viatjar en tren es tanben mai car. L’SNCF a pojat sos prèses del 2,6% tant pels trens regionals coma pels de granda velocitat. Lo taxi puèja de l’1% sus las tarifas e las asseguranças pòdon pojar fins al 4%. La Pòsta fa pojar del 15,20% lo prètz dels sagèls (vejatz la taula çai jos).
Lo salari minim interprofessional de creissença (SMIC) puèja del 0,8%, lo prètz brut per ora es ara de 9,61 èuros que fa 1457,52 èuros bruts per mes. Los foncionaris de classa C (que son lo 46% dels foncionaris) veiràn majorat un indèx de 5 ponches. Las retiradas (Arrco Agirc) puèjan del 0,1% per l’escotisson.
Tocant las prestacions familialas, lo plafon d’atribucion puèja del 0,7%. Lo revengut social d’activitat (RSA), qu’afècta 24 milions de fogals, puèja del 0,9%. Lo compte personal de formacion se substituirà al DIF.
La TVA davala al 5,5% pels que voldràn comprar un apartament dins un quartièr novèl, e lo prèst de taus zèro es estendut als apartaments ancians.
A respècte de l’impòst suls revenguts, la primièra lesca es suprimida.
Los retirats subjèctes a la contribucion sociala generalizada (CSG) passan del 3,8% de taus reduch al 6,6% de taus normal.
La taxa sus l’audiovisual puèja del 2,25%, passa de 133 a 136 èuros.
Estimacion del Jornalet sus lo prètz dels sagèls
2014 | 2015 | aumentacion en % | centims en mai | |
| sagèl Marianna roge, letra prioritària (adralhament a J+1) | ||||
| de 0 a 20 gramas |
0,66 |
0,76 |
15,152% |
0,10 |
| de 2 a 50 gramas |
1,10 |
1,25 |
13,636% |
0,15 |
| de 51 a 100 gramas |
1,65 |
1,90 |
15,152% |
0,25 |
| sagèl Marianna verd, letra verda (J+2) | ||||
| de 0 a 20 gramas |
0,60 |
0,68 |
13,333% |
0,08 |
| de 21 a 50 gramas |
1,02 |
1,15 |
12,745% |
0,13 |
| de 51 a 100 gramas |
1,55 |
1,75 |
12,903% |
0,20 |
| sagèl Marianna gris, “écopli” (J+4) | ||||
| de 0 a 20 gramas |
0,59 |
0,66 |
11,864% |
0,07 |
| de 21 a 50 gramas |
0,87 |
1,05 |
20,690% |
0,18 |
| de 51 a 100 gramas |
1,20 |
1,45 |
20,833% |
0,25 |
| mejana |
15,145% |
0,16 |
Dins l’estat espanhòl
En Aran, e delà lo Tunèl de Vielha, çò que mai remarcaràn los ciutadans es la pojada dels peatges de las autoestradas de l’estat, que lors prèses pojaràn per lo primièr còp dempuèi cinc ans.
Per contra, dins l’estat espanhòl remarcaràn pas brica de pojada del transpòrt public.
La TVA sofrirà pas cap de modificacion, pogèt ja fòrça del 18% al 21% en setembre de 2012.
Las bancas coneisseràn una nòva taxa del 0,2% suls depauses dels clients, que la deu pas pagar l’estalviaire mas la banca.
Los que vivon dins un ostal de logacion de renda anciana, a fòrça bon mercat, veiràn la fin d’aquel tipe de contractes, e deuràn pagar fòrça mai per l’abitança. Aquela mesura afectarà entre 65 000 e 85 000 contractes de logacion.
L’impòst sul revengut de las personas fisicas, conegut en Espanha amb la sigla IRPF, cambiarà las retencions que se practicaràn cada mes. Las retencions de l’IRPF dels trabalhadors independents (diches autonòms) davala del 21% al 19%.
Los caumaires de longa durada amb de cargas familialas poirián recebre una ajuda de l’estat, qu’es pas encara oficiala.
Dins l’estat italian
Los ciutadans de la republica italiana veiràn reduches lors impòstes aquesta annada que comença. E mai se Matteo Renzi anoncièt que 2015 seriá una annada dificila, lo Conselh dels ministres d’Itàlia aprovèt una reduccion dels impòstes de 18 miliards d’èuros, que cèrca d’encoratjar lo consume intèrne e de relançar l’economia.
Se redutz l’impòst sul revengut, s’elimina una taxa regionala sus la produccion industriala, las exempcions fiscalas a las familhas nombrosas.
Tanplan s’es anonciat de nòvas prestacions de caumatge per una valor d’1,5 miliard d’èuros, e mai 500 milions per la reforma de l’educacion, 6,9 miliards per de despensas derivadas de la pròpria legislatura e 3 milions per l’eliminacion d’autres impòstes.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#3 A tot senhor son umor…
#2 Qoelet? Quina modestia dens la causida deu vòste psèudo...
Res nòu jol solelh… A l'estat francés, tot aumenta mai que los revenguts dels mai paures (sens parlar dels revenguts qu'aqueles que son a pro pena mens paures que los primièrs) : donc los paures son de mai en mai paures. Parlatz de novetat ? A l'estat italian, se pagarà mens d'impòstes e aital, i aurà mens de moneda per ajudar a las politicas e als servicis publics : donc son que los mai rics poiràn èsser servits, e los paures, coma de costuma, estaràn de caire a mirar los rics pagar mens de contibucion comuna. E al reialme castelhan d'Espanha, i vesètz venri mens paures los paures ? Res de nòu jols solelh liberal mondalizat… E bona annada de paurum als paures, de desprovesiment als desprovesits, de precartitat montat als precaris, n'inanitat sociala als sens emplèc, de subrespletacion a res non còsta als qu'en encara un emplèc, bona annada plan sotmesa, plan resignada e plan semblanta a totas las autras, en pièger, coma de costuma. E… en occitan, se vos plai !
Un esser liure se pausa pas la question de saber si l'òm vai paiar mens o mai de taxas mas a de que van servir los impòts. Es quò que queus impòts servan a far lo bonur daus abitants o ben si fan una societa que polua, que dilapida las resorças energeticas de la terra, que fabrican daus rebuts que van empoisinats per de nombrosas annadas
Es achabat lo temps ente sufisia de norir, lotgear, vestir. Partirem de l'ipotesi qu'esser uros sur aquela terra condiciona l'economia, la santat e pas lo contrari. Belcòp de monde se disan contre lo centralisme jacobin mas se catan darier un estat poderos que los aciala e lòr balha de las certitudas per lo biais de las disciplinas scientificas o filosoficas. "L'òm tròba dins l'obra d'un grand òme quauaqu'a ren d'eternau".
Potina, lo cap de lRussia, es benleu un porit, un imperialiste mas es pas diferent d'un president daus Etats -unis, o d'un rei de França, o d'un president de la Republica francesa. Autre còp sufisia a Angletera e Françs d'una canoniera per conquesir China. Uei, la canoiera a cambiar de camp; es d'au costa de China o de Russia e trobatz que quo es ren.
Ieu, juga pus a d'aquò. Pus jamai me caterai darrier un estat poderos o la Sciença, o ben Diu. Cambarai de mentalitats : esser de bons òmes, de las bonas dames coma au temps daus catares. Coma? en fasant passat las qualitats umanas avant las qualitas materialas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari