Elisabeta II s’acampèt dimècres passat amb Martin McGuiness, actual viceministre de l’Irlanda del Nòrd. Es la primièra reünion dempuèi la fin de la lucha armada.

La reina Elisabeta II d’Anglatèrra saludèt l’èx-cap de l’Armada Republicana Irlandesa (IRA) e actual viceministre de l’Irlanda del Nòrd, Martin McGuiness, del Sinn Féin. Una tocada de mans istorica, perque es lo primièr còp que s’amassan catòrze ans après la fin de la lucha armada.
 
La tocada de mans se debanèt de matin, a l’intrada del teatre liric de Belfast, pendent un acte de celebracion de la cultura irlandesa. I aguèt après una reünion marcanta dins lo procès de patz de l’Irlanda del Nòrd. “S’agís de far un gèst en favor de la patz e de la reconciliacion”, çò diguèt McGuiness, que soslinhèt lo besonh de reconéisser la dolor de totas las victimas del conflicte e de las lors familhas, segon un pòrtavotz del Sinn Féin.
 
Al moment dels adieus, McGuiness diguèt a la reina d’Anglatèrra en gaelic: “Adieu‑siatz, que Dieu vos benesisca”.