Ei Portugal qui atacava aquera partida dab un ritme pro eslhevat qui a susprès un pauc Espanha, acostumada dinc adara a gerir equipas pro timidòtas. Lo capitani emblematic portugués, Ronaldo, a mancat de pauc d'obrir la marca après trenta minutas de jòc mes sa frapa ei passada a costat de las caujas de Casillas.

 

En segond periòde, Portugal, dominator, s'ei creat quauquas ocasions qu'a pas podut concretizar, sovent per manca de luciditat e d'esperit collectiu en ataca. Los espanhòus estant pas capables tanpòc d'inquietar seriosament Rui Patricio, l'escòre èra de 0 pertot a la fin deu temps reglementari.

 

En las prolongacions, Espanha s'ei desvelhada, sus un centre d'Alba, Iniesta reprenèva la bala mes lo guardian portugués avè plan seguit. Cinc minutas mei tard, un còp franc de Sergio Ramos passava de pauc a costat. En tota fin de partida, las duas equipas an près de risques e la bala passava d'un camp a l'autre mes tostemps shens nat gòl.

 

De mau acceptar qu'ei la règla deus penaltis mes cau plan un ganhant, e a d'aqueth jòc son los campions en títol qui se son impausats, Fàbregas a marcat lo darrèr penalti qui qualifica Espanha per sa tresau finala de competicion internacionala de reng, un esplèit pas jamèi realizat despuish Alemanha en las annadas 70. Portugal manca de pauc una navèra finala après la de 2004, mes pòt estar fièr de sons jogaires.

 

En finala, Espanha afrontarà Itàlia o Alemanha que jogan aqueste ser a Varsovia, un encontre gavidat per l'arbitre francés Stéphane Lannoy.




Matieu Casanòva