Dins la nuech dau 16 au 17 d'abriu passat, los pomiers lemosins e peirigòrds son estats manhats per lo giau en plena florason. Los arboricultors demandan de las ajudas financieras a l'Estat.

N'i a 3000 ha plantat de pomiers en Lemosin e 1800 en Peiregòrd per una produccion annadiera de mai de 100 000 tonas. Ujan, se ne'n perdrà 90% segon las estimacions. Après la sechiera antan, lo giau es una novela catastròfa naturala que manha la filiera. Los agricultors migran tant per lors revenguts e la perennitat de lor ben que per l'emplec. Son 2000 a 3000 los sasoniers que trabalhan chada darriera en Lemosin a culhir las pomas. Auràn pas mestier d'ilhs ujan e los quites emplecs regulars (4000 en Lemosin e 560 en Perigòrd) son desjà en chaumatge parciau. Per çò qu'es dau revengut, los 10% de frucha que se podràn culhir sufiràn pas per ne'n balhar un aus agricultors. E mai coma seràn de meschanta qualitat, auràn pas l'apelacion d'origina protegida, seràn destinats a las compotas e se vendràn mens char.

Entau, fai dos mes que la pomocultura lemosina e peirigòrda se mobiliza per obténer de las ajudas per calamitat agricòla. Daumatge pas assegurable, la calamitat agricòla beneficia d'ajudas especificas. Pertant, per los responsables sindicaus, seràn pas sufisentas estant donat l'excepcionalitat de l'eveniment. Se viran maitot vers la collectivitats localas coma la region Lemosin que rescontreron lo president Jean-Paul Denanot fai quinze jorns. Lor asseguret de son sosten au près de l'Estat, tant per las indemnizacions daus agricultors coma las de lors salariats e de trobar de las formacions per los que serián au chaumatge. Prepauset quitament de las ajudas regionalas dins lo limit de sas possibilitats e en concertacion emb las autras collectivitats. "Tot serà fach per manténer la capacitat de produccion de la pomocultura lemosina", çò-disset Jean-Paul Denanot. De veire si las ajudas 'ribaràn pro regde per limitar las consequéncias economicas e socialas de quela nuech de giau.




Maime Caillon