Las victimas collateralas de l’accion criminala contra Charlie Hebdo son los fidèls musulmans, qu’e mai se mantes an ja condemnat l’atemptat, an vist coma òm los agacha amb suspicion e mesfisança.
 
Dimècres passat se debanèron en Occitània d’atacas islamofòbas a la Novèla (Narbonés) e a Caromb (Comtat Venaicin).
 
A la Novèla un individú tirèt de còps de fuòc amb un pistolet de granalha sus la pòrta d’una sala de pregària, çò raportèt Midi Libre. Aürosament los fidèls que s’i amassan per pregar èran ja partits fasiá gaire e solament cal lamentar qualques vitras brigalhadas.
 
A Caromb (Comtat Venaicin), tirèron de còps de fuòc sus una familha musulmana, çò rapòrta Le Figaro. Las balas toquèron solament la veitura e i a pas cap de ferit. La brigada de recèrca de Carpentràs s’encarga de l’enquèsta.
 
Dins l’estat francés cal lamentar lo lançament de granadas de gip lançadas contra una mosqueta a vila de Lo Mans, qu’aürosament causèt pas cap de victima tanpauc. En Aguiaina, la mosqueta de Peitieus es estada tagada amb l’inscripcion “mòrt als arabis”, çò indica la Nouvelle Republique. En Arpitània cal plànher una explosion criminala davant un snack-bar kebap, al costat d’una mosqueta a Velafranche (en francés Villefranche-sur-Saône), çò rapòrta Le Progrès.
 
 
De reaccions antifaissistas
 
Lo sit antiracista francofòn La Horde a publicat doas reaccions, fòrça desparièras mas interessantas dins lo contèxt actual, qu’analisan la creissença e la retroalimentacion de l’integrisme islamic violent e del racisme e l’islamofobia dins l’estat francés. Un editorial es de Yannis Youlontas, militant antifaissista pròche dels dessenhaires assasinats, e l’autre es de Julien Salingue, cercaire en sciéncias politicas e militant de la causa palestiniana.