Lo sequestraire del supermercat josieu de la Porte de Vincennes, Amedy Coulibaly, que probable tuèt per carrièras la jove policièra municipala de Montrouge, la martiniquesa Clarissa Jean-Philippe, e provoquèt la mòrt de quatre ostatges sieus abans de morir pendent l’assaut policièr, rescontrèt en persona en julhet de 2009 Nicolas Sarkozy quand èra president de França. Aviá alara 27 ans e fasiá partida d’un programa de formacion pels joves. Sarkozy l’aviá rescontrat, amb nòu jovenòmes e joventas, per parlar amb las entrepresas engatjadas en favor de l’emplec del jovent.
 
Just abans lo rescontre, lo quotidian francés Le Parisien interroguèt Amedy Coulibaly (l’article ortografia son prenom “Amedi”), que semblèt nerviós: “Non sai çò que dirai al president. Començarai amb un «Adieu-siatz».” Expliquèt apuèi que li agradariá que lo president l’ajudèsse a servar son trabalh temporari a la fabrica de Coca-Cola de sa vila natala, Grigny (Illa de França, departament d’Essonne), puèi que son contracte de dos meses e mièg èra a mand de s’acabar.
 
Pendent l’entrevista,  diguèt que voliá  d’autografs e de fòtos amb lo president francés per los mostrar a sas nòu sòrres —Amedy Coulibaly èra lo sol gojat de sa familha—. Admetèt que Sarkozy èra pas gaire popular dins lo jovent dels quartièrs , abans d’ajustar  qu’aquò aviá pas res de personal: “En fach, es lo cas de la majoritat dels politicians”. “Lo rescontrarai de verai, es impressionant. Qu’òm l’aime o non, es totun lo president”, çò concluguèt.
 
Amedy Coulibaly fasiá partida de la meteissa cellula jihadista que los assalhidors de la revista Charlie Hebdo, los fraires Kouachi.