Dison qu’es lo nòu Bin Ladin, mas es encara pièger. Se fa apelar Abu Musab As Suri (“lo sirian”), mas s’apèla en realitat Mustafà Setmariam Nassar. A un passapòrt espanhòl despuèi 1985 perque o es sa molhèr, Elena Morena, que se definissiá coma una atèa d’esquèrra abans de se convertir a l’islam. El nasquèt en Siria. Viviá a Granada, mas ara ja fa un bèl brieu que degun sap pas ont es. O abandonèt tot per partir al combat. Foguèt detengut plusors còps e en divèrses païses. Los servicis secrets de Paquistan lo detenguèron abans de lo donar als estatsunidencs. Mas aquestes lo mandèron en Siria, que son govèrn lo liberèt. Uèi totòm pensa qu’es liure e que viu endacòm en Siria o Iraq, fòrça probable a Alèp, ont nasquèt en 1958.

As Suri a escrich de libres que circulan intensament dins los cercles islamistas. Lo principal es la Crida a la resisténcia islamica mondiala, un volum de 1 600 paginas que descriu una nòva estrategia e que critica Al Qaida e Bin Ladin. As Suri crei que l’estrategia d’Al Qaida es estada contraproductiva, perque a permés a l’Occident d’atacar Afganistan e de destruire la basa màger del jihadisme internacional.

Coma alternativa, prepausa de cometre d’atemptats selectius que los realizen de cellulas completament autonòmas e sens relacion amb nat comandament comun. E mai ne poirián cometre d’individús sols —los famoses e temuts “lops solitaris”, gaireben impossibles de detectar per la polícia—. Las atacas devon èsser tostemps fòrça duras e non sonque contra de crestians, mas tanben contra los musulmans “traites”. Las cal far mai que mai dins los païses occidentals amb fòrta populacion musulmana. La volontat explicita d’As Suri es de provocar una guèrra civila entre la populacion non musulmana e la musulmana, de far que la convivéncia siá impossibla. L’atemptat de París contra Charlie Hebdo e las fusilhadas de Montrouge e de la Porte de Vincennes i correspondon d’a fons.

Aquesta definicion de çò qu’el apèla lo “tresen jihad”, coma projècte basat sus l’accion individuala, a pas empedit son apièja a Jabhat Al Nusra, un dels grops que combaton en Siria e an capitat a implantar una basa territoriala pròpria.
 

Preocupacion del govèrn espanhòl 

Al govèrn espanhòl, lo preocupan particularament las activitats d’As Suri e  son influéncia creissenta. Pendent las annadas que visquèt a Granada, s’entestèt a difondre l’idèa d’un retorn a Al Andalós, e reclamava una bona part d’Andalosia coma país islamic. Certans expèrts se pensan que son òbra influencièt Bin Ladin, que de 2002 enlà comencèt d’inclure Al Andalós dins la lista dels “territòris de liberar”.

Cossí que siá, la situacion de crisi dins l’estat francés pendent aquestes tres darrièrs jorns sembla de voler illustrar que l’estrategia d’As Suri comença de se botar en plaça.