De centenats de milièrs de personas manifestèron ièr per las carrièras de París en sosten a las victimas dels atacs jihadistas dels darrièrs jorns. La marcha foguèt multitudinària. Segon los organizaires, manifestèron un milion e mièg de personas, e qualques mèdias franceses an elevat aquela chifra fins a dos milions e mièg.
 
Al cap de la marcha i aviá los principals dirigents europèus: la cancelièra alemanda Angela Merkel, lo primièr ministre britanic David Cameron, lo sieu omològ italian Matteo Renzi e lo president espanhòl Mariano Rajoy. Lo president de Catalonha, Artus Mas, jonguèt tanplan l’eveniment. Mas la preséncia mas soslinhada es estada benlèu la del president palestinian, Mahmud Abbas, e la del primièr ministre israelian, Benjamin Netanyahu.
 
Una de las bandieròlas mai destacadas èra la que reprodusiá los uèlhs de Charb, lo director assassinat de Charlie Hebdo en grandas dimensions.
 
 
En Occitània
 
En Occitània se son debanadas tanben de manfestacions dins fòrça vilas, las mai nombrosas a Bordèu, Marselha e Tolosa. Bordèu recampèt aperaquí 100 000 manifestants e Marselha aperaquí 60 000. Tolosa aviá manifestat un jorn abans en recampant 110 000 personas.
  

fffff		fffff
	“Soi Charlie”: 110 000 occitans per la marcha a Tolosa del 10 de genièr   Segon la polícia, i aviá 110 000 occitans per la marcha a Tolosa del 10 de genièr en seguida de l’atemptat contra Charlie Hebdo.   La manifestacion foguèt organizada per un ensemble d’organizacions e foguèt la Liga dels Dreits de l’Òme de Miègjorn-Pirenèus que faguèt la declaracion oficiala.   Malgrat una organizacion quasi inexistenta e sens servici d’òrdre, e quasi sens polícia ni seguretat civila, la marcha recampèt una fola immensa. Benlèu foguèt la marcha mai bèla jamai organizada a Tolosa.   I aviá de mond que caminavan dempuèi las avengudas perifericas per arribar a las Alèas Joan Jaurés qu’èran lo luòc de despart.   Calguèt mai de 2h per que lo mond poguèsson començar de caminar. La marcha empliguèt los Baloards de Jean Jaurés fins a Sant Çubran (los tres quarts dels baloards de Tolosa) en passant per lo Pont Sant Miquèl. I aviá tant de mond qu’una part deguèt passar per la Carrièra de Mètz e lo Pont Nòu.   I aviá de mond de tota la region e de totas las edats, dins la calma, amb d’aplaudiments que percorrián lo cortegi.         Jean-Charles Valadier