Diluns a sèt oras del matin, la gàrdia civila espanhòla detenguèt, dins divèrsas vilas  de l’estat, setze ciutadans bascos, dont dotze son d’avocats de presonièrs politics e los autres son de consultants. Justament aquel jorn se deviá celebrar lo jutjament contra trenta cinc militants de Batasuna, dont Aurore Martin o Pernando Barrena que publiquèt sus Twitter: “Dins la nòstra ostalariá de Madrid, la Gàrdia Civila deten los nòstres avocats. Democracia a la turca!”.
 
La cort de l’Audiéncia Nacionala espanhòla, lo naut tribunal d’excepcion que deviá jutjar los militants bascos, amassèt dètz e nòu acusats per lor demandar se volián èsser jutjats amb d’autres avocats, çò qu’evidentament refusèron, e lo jutjament foguèt suspendut.
 
Los avocats e consultants los an detengut e los an acusats d’emblanquiment d’argent e fraudariá fiscala, perque aurián pas declarat de revenguts. E mai, segon lo ministre espanhòl de l’interior, Jorge Fernández Díaz, “aqueles avocats bascos constituissián lo tentacul que permetiá a ÈTA de contrarotlar los presonièrs condemnats dins las presons espanhòlas e francesas”.
 
La gàrdia civila requisicionèt tanben l’argent que s’amassèt dimenge a Bilbao durant la manifestacion de sosten als dreches dels presonièrs politics. Aquel argent, èran de dons per sosténer lo prètzfach de Sare, un ret ciutadan que sa tòca es de defendre los dreches umans de las personas presonièras, exiliadas e deportadas bascas.