Los comptes Twitter e YouTube de l’US Central Command foguèron atacats diluns passat. L’US Central Command es lo comandament de l’armada dels Estats Units responsable de las operacions dins los païses arabis e asiatics. Un grop que ditz qu’agís en nom de l’Estat Islamic publiquèt de fotografias del “cibercalifat” sul compte Twitter, e difondèt un fum de documents militars intèrnes, que contenon de listas de noms e de telefòns de membres de l’armada. I aviá tanben de documents que semblavan de mapas militaras de la zòna de Corèa e de China. Qualques minutas après l’atac, lo compte Twitter foguèt suspendut.
 
En acompanhant la publicacion d’aqueles documents i aviá aquel messatge recurrent:
 
“Soldats americans, venèm, fasètz atencion”, e s’i apondiá aqueste ligam, amb lo messatge seguent: “En nom de Dieu, lo Compassionós, lo Misericordiós, lo Cibercalifat jols auspicis de l’Estat Islamic contunha son ciberjihad. Mentre que los Estats Units e lors satellits tuan los nòstres fraires en Siria, Iraq e Afganistan, penetram dins lors rets e dispositius personals e o sabèm tot sus vosautres. Veiretz que i a pas cap de misericòrdia envèrs los desleials. L’Estat Islamic es ja aicí, sèm dins vòstres ordenadors, en cada basa militara. Amb la permission de Dieu sèm ara al CENTCOM. Nos arrestarem pas! O sabèm tot sus vosautres, las vòstras femnas e los vòstres enfants. Soldats dels Estats Units, vos susvelham!”
 
E apondián en seguida de ligams amb d’informacions sus de telefòns mobils del personal militar.
 
Lo canal de YouTube de l’US Central Command foguèt tanben atacat, e s’i apondèron dos vidèos de propaganda de l’Estat Islamic.
 
Aquel atac informatic se passèt justament quand lo president dels Estats Units, Barack Obama, preparava un discors sus la ciberseguretat.