Causa sabuda sia, Itàlia a pas panat aquera plaça en finala. Despuish lo debut de la competicion, la Squadra Azzura a esfaçat tots los prejujats qu'avèm suu fotbòl italian en prepausar un jòc ofensiu, agradiu, e un esperit d'equipa exemplari. Ger ser totun, los alemans semblavan favorits: mes eths qui despuish quauquas annadas an tanben revolucionat lor fotbòl an pas sabut aqueste còp mestrejar l'adversari.

 

Dab Balotelli, sabem pas jamèi se serà expulsat au cap de quauquas minutas o se harà tremolar las defensas shens forçar. La responsa a pas tardat ger : sus un servici deu genièc Cassano, l'atacant de Manchester City reprenèva lo balon deu cap e marcava lo prumèr gol. Super Mario doblava l'escòre 10 minutas abans la pausa dab una frapa remirabla, que lo praube Neuer podèva pas har gran causa.

 

Lahm, puish Reus, an temptat shens escaduda de redusir la marca, mes Itàlia a mancat tres còps lo KO tecnic en estar brolhon davant las caujas alemandas. Totun la Squadra a plan gerit lo segon periòde, un penalti a tres minutas de la fin concretizat per Özil a un pauc relançat lo suspens mes ei plan Itàlia qui afrontara Espanha dimenge. Los espanhòus, campions en títol, son favorits e los italians outsiders, un estatut qui sembla agradar hòrt au campion deu monde 2006.




Matieu Casanòva