Dimars passat s’inaugurèt a Blanhac (Gasconha Tolosana), a las pòrtas de l’usina d’Airbus, lo musèu aeronautic Aeroscopia, que conten 80 pèças provenent de colleccionaires apassionats e del gigant industrial Airbus, segon çò que rapòrta l’AFP.
 
Al musèu, dobèrt al public dempuèi ièr dimècres, se pòt veire una replica de l’avion de Louis Blériot que traversèt la Manja en 1909, un avion Concòrdia e lo primièr Airbus, l’A300 de 1972. I a tanben un vintenat d’autres avions, suspenduts o al sòl, coma la replica del Morane-Saulnier de Roland-Garros o un Mig 15 sovietic de la Guèrra Freja. A l’exterior i a una Caravèla e l’avion Concòrdia que faguèt son darrièr vòl en junh de 2003 cap a Tolosa. D’aparelhs de tota sòrta, tan civils coma militars, seràn expausats lèu, aportats que son per las associacions agropadas dins Tèrra d’Enaurament.
 
“Un A400M de transpòrt militar, lo primièr sortit de las cadenas, deuriá arribar abans l’estiu, e tanben un A380 de presèria, quand aurem una basa de betum per suportar lo gigant”, çò ditz a Libération Jacques Rocca, director d’Airbus Heritage, un departament del grop per preservar los simbòls de l’istòria. Lo musèu tanben compren un centre de documentacion, una fresca istorica de 58 mètres e d’illons tematics.
 
Gerís lo musèu la societat Manatour, qu’a fach una prevision de 120 000 vesitaires en 2015 e de 150 000 dins sièis ans.
 
Lo projècte a costat 21,5 milions d’èuros en finançaments publics e privats. La comuna de Blanhac a portat 8,45 milions, Tolosa Metropòli 5, Airbus 3,5, la region de Miègjorn-Pirenèus 2,7 e lo departament de la Nauta Garona 1,6 million. “A calut aperaquí 30 ans entà que lo sòmi venga ua realitat”, çò diguèt lo cònsol de Blanhac, Bernard Keller.
 
La vesita del musèu costarà 11,50 èuros pels adultes, amb un suplement de 3,5 èuros per una vesita guidada. Per 23 èuros s’ofrís una vesita del musèu e de l’usina A380.