Lo gendarma que lancèt la granada mortala sus Rémi Fraisse sortiguèt ièr de ser de gàrdia a vista, qualques oras après i èsser plaçat. “Aquela decision prejudica pas en res la seguida”, especialament prejudica pas una eventuala convocacion ulteriora del gendarma, çò precisèt lo procuraire segon d’informacions de Le Figaro.
 
Aquela gàrdia a vista s’èra inscricha dins l’encastre de l’informacion judiciària dobèrta pel ministèri public de Tolosa per “violéncias volontàrias avent entraïnat la mòrt sens intencion de la donar, faches comeses per una persona depositària de l’autoritat publica dins l’exercici de sas foncions”. Segon Le Parisien, la font judiciària aviá causit lo regim de la gàrdia a vista “per li permetre de beneficiar dels dreches de la defensa e presàgia pas de seguidas que seràn donadas al dorsièr”.
 
Lo policièr entendut èra, al moment de la tragèdia, cap d’un grop de uèch militars encargats de segurizar la “zòna de vida” del sit de Sivens.
 
Fraisse foguèt tuat dins l’encastre de la repression d’una protèsta populara contra la construccion d’una restanca dins la zòna umida del Testet, a Sivens (Galhaqués).
 
 
Un rapòrt “incomplet, parcial e malonèst”
 
L’avocata de la familha de Rémi Fraisse, Arié Alimi, a denonciat “un rapòrt incomplet, parcial e malonèst”. Le Figaro rapòrta qu’après la mòrt de Fraisse, mantes ecologistas an acusat las fòrças de l’òrdre d’aver mal gerit las manifestacions contra la construccion de la restanca, e lo ministre de l’interior, Bernard Cazeneuve, d’aver amagat una partida de la vertat.
 
De fach, la mòrt de Rémi Fraisse portèt la crisi al govèrn francés. Las nombrosas susmautas que s’ocasionèron per tot l’estat francés, en seguida de la mòrt de l’estudiant de botanica, portèron de problèmas al govèrn de la Republica.
 
Lo govèrn francés ensagèt de reglar la mòrt del jove tolosan en enebissent l’usatge de las granadas e en suspendent los trabalhs del barratge, mas un larg sector de la societat, los movements ecologistas e de partits d’esquèrra demandan la demission del ministre Cazeneve, que s’es limitat a dire que i aurà “de sancions se s’es comés de fautas”. Las protèstas e las susmautas se debanèron per tot l’estat, la majoritat amb d’afrontaments violents entre manifestants e policièrs.