Lo 21 setembre passat, dins lo massís argerian de Jurjura, en Cabilia, lo grop jihadista Jund Al Khilafa (“los soldats del califat”) raubèt lo guida de montanha Hervé Gourdel, un occitan de Niça, en represalhas a l’engatjament de l’aviacion francesa contra l’Estat Islamic, puèi lo decapitèt.

Se trobava pas lo còrs sens tèsta de nòstre paure compatriòta, malgrat l’intervencion de l’armada argeriana, qu’aviá desplegat 3000 òmes en cèrca del grop jihadista. Lo 22 de decembre, matèron son cap, Abdelmalek Gouri, qu’aviá revendicat lo raubament e la decapitacion.

Dijòus 15 de genièr, s’anoncièt que l’armada argeriana veniá enfin de retrobar lo còrs d’Hervé Gourdel dins la montanha d’Akbil, non luènh del luòc de son assassinat. Dimècres 14 de genièr, avián tornat bandir las recèrcas gràcias a una unitat d’elèit cinofila e d’indicas d’un islamista armat.

Dijòus de ser, s’esperava pasmens encara una confirmacion oficiala de l’identitat del cadavre gràcias a l’expertitge d’espròvas ADN qu’èran a mand de los menar las autoritats d’Argeria.




GJB