Lo 3 de genièr, lo grop jihadista Boko Haram organizèt un durissim atac contra doas aglomeracions, Baga e Doro Gowon, que restèron parcialament rasadas, al nord-èst de Nigèria, en riba del Lac Chad. Segon lo govèrn, lo grop extremista dirigit per Abubakar Shekau daissèt darrièr el cent cinquanta mòrts, una chifra que se multiplica fins a dos mila mòrts segon lo relat de certans subrevivents. D’organizacions coma Amnestia Internacionala (AI) e Human Rights Watch (HRW) an assajat de n’esclarzir la chifra a travèrs d’imatges per satellit dels dos sits, abans e après l’atac.

Tant AI coma HRW venon de publicar d’imatges per satellit de Baga e Doro Gowon corresponent al 2 de genièr, un jorn abans l’atac, e al 7 de genièr. Las fotografias evidéncian graficament la talha de l’assaut dels milicians fondamentalistas: segon las doas organizacions, òm i pòt comptar 3700 edificis destruches o degalhats, entre ostals, pichons comèrcis, escòlas, clinicas e mosquetas.

“Los imatges detalhats mòstran la devastacion de proporcions catastroficas en doas aglomeracions, qu’una d’elas es restada gaireben escafada de la mapa en solament quatre jorns”, çò denóncia AI, que considèra que benlèu s’es assassinat fòrça mai de persones que non pas las qu’estiman las autoritats nigerianas dins “l’atac pus mortifèr de Boko Haram”.

Baga ja patiguèt en abril de 2013 un autre atac de grandas proporcions, en aquel cas perpetrat per l’armada nigeriana, en responsa a l’assassinat d’un soldat per de milicians de Boko Haram, qu’aquestes darrièrs provenián presumidament d’aquel sector en riba del Lac Chad.

---

Cecília Hautefeuille: Quau son los de Boko Haram?