Après una setmana complicada (eliminacion en Copa de França per Ajaccio, e desfaita a Nancí), e al moment qu'un començament de crisi menaçava, Montpelhièr sortiguèt dissabte de l'auratge anonciat amb aquela victòria rufa contra St-Estève. Olivier Giroud, cada setmana mai decisiu, marquèt son dètz-e-ueiten gòl en tota fin de partida, desliurèt d'un còp lo public de la Palhada (1-0, resultat finau), e quilhèt lo club eraurés al som de la Liga 1.

 

Lo solatjament èra afortit encara l'endeman per la bona partida a París d'aqueles Girondins de Bordèu susprenents, qu'encadenan setmanas plenas e voidas. E se pòdon quitament regretar de tornar a casa sens los tres punts, après un tir sus la barra transversala e una dominacion quasi tot de long de l'encontre. Los parisencs, desvelhats pel gòl de Diabaté, respondèron pauc après amb una accion luminosa de Bodmer conclusida per Hoarau. Bordèu, incapable de tornar prene lo dessús malgrat los ensais mancats de Diabaté e Ben Kalfallah, se'n tornèron a casa amb un punt, e l'espèr prim de lutar encara per Euròpa.

 

Davant, Tolosa seguís lo ritme amb sa victòria sus Aussèrra. La partida, complicada fins a la fin malgrat la feblesa dels borguinhons, s'acabèt plan pel TFC. Lo gòl de Tabanou, un polit còp d'en defòra de la superfícia, foguèt una recompensa plan meritada après una partida solida dels garoneses. La quatrena plaça n'es la consagracion, pauc esperada en debuta de sason, mas fòrça justa. Las qualitats collectivas e fisicas d'aquela equipa pòdon quitament faire somiar d'aquesta tresena plaça tenguda per Lilla ara per ara, se per cas l'oposicion decisiva entre los dos clubs (dimenge 1èr d'abriu, 17h) vira plan per los violets.

 

D'autre caire, lo dèrbi provençau entre Niça e Marselha, determinant pels dos clubs (l'un se vòl salvar, l'autre ensaja de gaitar pel naut del classament) s'acabèt per un rampèl, pauc satisfasent pels dos. Mas los niçards pòdon regretar aquela resulta, après aver menat lo jòc tota la partida,e jogat en superioritat numerica tota la segonda mieja-tempsada. Son los òmes de Deschamps que dobriguèren la marca, mercés a Andre Ayew e una bona pojada de Cesar Azpilicueta, mas que poguèron pas contenir la volontat dels niçards, installats dins la superfícia marselhesa fins a la fin. Lo rampèl (sus penalty) de Monzon dins l'ultim quart d'ora permet a Niça de gardar Can, primièr non-relegable en vista. De notar la nafradura de Diawara, tocat al genolh, e que serà absent per sièis meses almens.

 

Las resultas:
 

Montpelhièr – AS Sant Estève 1-0 ; Evian TG – Lilla OSC 0-3 ; Lion – Sochaux 2-0; Niça – Marselha 0-0 ; AC Ajaccio – Lorient 1-1 ; Brèst – Nancí 0-1 ; Valencianas – Rennes 1-0 ; Tolosa – Ausèrra 1-0 ; Dijon – Can 2-0 ; París SG – Bordèu 1-1

 

 

 

La maissanta operacion de la dimenjada es per Clarmont, que perdèt a Tròias, adversari dirècte per la pojada, quand l'Estadi de Rems gardèt son ritme en s'impausar sens esquiç contra Mètz. Per primièr còp dempuèi agost, Clarmont quitava las plaças que menan a la Liga 1, e vesiá Sedan s'aprochar a un punt.

 

Istre perdèt un bon parat de s'aprochar d'aquelas plaças, en demòrant sus un rampèl al Havre. Arle demòra dins la pança del classament, amb son rampèl contra lo leader Bastia, mas ne quita pas tanpauc sa posicion menaçada per las quatre equipas a l'espèr dins la luta pel manten.

 

Mónegue contunhèt son operacion de salvament, amb una quatrena victòria en seis partidas (n'an pas perdut dempuèi la fin de febrièr). Los esfòrces, las intencions e los melhoraments tecnics s'auràn de perseguir, ça que la, per s'esperar salvar.

 

Arle-Avinhon – Bastia 0-0 ; Rems – Mètz 3-0 ; Amians – Sedan 0-3 ; Mónegue – Châteauroux 2-1 ; Le Havre – Istre 0-0, Laval – Tors 1-2 ; Angieus – Guingamp 1-0 ; Boulogne – Le Mans 2-0 ; Tròias – Clarmont 3-2 ; Lens – Nantas 1-0.