La direccion del grop Vranken, proprietari de la vinha de Listèl, depausèt lo 19 de junh un permés de bastir a Aigas Mòrtas, en Gard. Vòlon daissar lo maine istoric del Lido, a Seta, entre la Mar Mediterranèa e l’Estanh de Taur, e implantar lo sèti social e l’usina de mesa en botelha sul sit de Jarràs, a Aigas Mòrtas.

Es pas novèl lo projècte de mudança: mantes elegits setòris se pensèron ja d’amainatjar lo Lido d’autre biais. S’es ja imaginat de sits toristics, de marinas o de residéncias, malgrat los risques d’aigats que pertòcan lo parçan. Pasmens, dempuèi la ventòria de 2010, la reglamentacion s’es refortida, e uèi lo dia l’unic repreneire possible sembla d’èstre lo Conservatòri del Litoral.
 
Pel Paul Vranken, proprietari de Listèl dempuèi 2005 —es tanben lo mèstre dels champanhas Pommery—, la volontat de mudar ten una autra font. S’agís aquí d’amassar los sits de Seta e d’Aigas Mòrtas per melhorar la rendabilitat. De fach, l’activitat de l’entrepresa es dividida entre los dos maines alonhats de 60 quilomètres aperaquí, çò que còsta fòrt a l’entrepresa, segon la direccion.
 
Los emplegats an recebut la novèla amb d’interrogacions. L’investissament necessari per aquela mudança es consequent. Se parla de quinze milions d’èuros per desplaçar l’usina, e de quinze milions de mai per arrancar e, apuèi, tornar plantar lo vinhièr, quand la venda del sit non poiriá pas pojar gaire mai que de sièis milions d’èuros. Subretot, lo grop Listèl afronta dempuèi d’annadas una baissa de sa chifra d’afar, passada de 76 milions d’èuros en 2007 a 57 milions d’èuros en 2011. Ara, los 300 emplegats de Listèl espèran una presa de paraula del grop, per aclarar drin lor situacion e levar los dobtes sul calendièr e l’organizacion d’aquela mudança.