L’armada ucraïnesa e las milícias pròrussas s’afrontan pel contraròtle de l’aeropòrt de la vila. Las autoritats de Donetzk acusan Kyiiv d’aver bombardat la populacion civila aquesta dimenjada. Poroshenko assegura que cedirà pas manco un centimètre de territòri.

L’armada ucraïnesa e los independentistas pròrusses son restats a se combatre pendent tota la dimenjada pel contraròtle de l’aeropòrt de Donetzk. Las informacions qu’arriban sus qual contraròtla l’infrastructura son contradictòrias. Lo govèrn d’Ucraïna ditz que son armada a recuperat una bona partida de l’aerodròm, del temps que las autoritats de la Republica Populara de Donetzk afirman qu’an capitat de manténer lo contraròtle del sit.
 
La Republica Populara de Donetzk se proclamèt independenta d’Ucraïna en abril passat, al meteis moment que la vesina Republica Populara de Luhansk. Cap d’estat del Mond las a pas reconegudas. Ucraïna assegura que los dos estats autoproclamats recebon lo sosten economic, politic e militar de Russia.
 
De fonts localas asseguran que l’escalada militara d’aquestes jorns es la pièger dempuèi l’estiu passat. Las doas partidas s’acusan mutualament d’aver représ las ostilitats. Teoricament l’alta al fuòc es en vigor, mas se respècta pas.
 
 
Lo president ucraïnés promet que cedirà pas manco un centimètre
 
Lo president d’Ucraïna, Petro Poroshenko, assegurava dimenge passat que pensa pas manco de cedir ni un centimètre de territòri ucraïnés als independentistas de Donetzk e Luhansk. O diguèt pendent un recampament en memòria de las dotze victimas mortalas d’un atac contra un autobús a Volnovahka. Kyiiv acusa los pròrusses d’èsser los autors de l’atac, çò qu’eles nègan.
 
En fach, las autoritats de la Republica Populara de Donetzk asseguran qu’es l’armada ucraïnesa qu’ataca la populacion civila dempuèi qualques jorns. D’un costat, dison que l’aviacion ucraïnesa ataquèt ièr Horlivka. De l’autre, afirman que l’artilhariá ucraïnesa a atacat pendent la dimenjada qualques quartièrs residencials de Donetzk.
 
Mentretant, lo secretari de premsa de la presidéncia russa, Dmitrii Peskov, afirma que Poroshenko a refusat una proposicion del cap rus, Vladimir Putin, per que l’armada ucraïnesa e las milícias de Donetzk e Luhansk retiren l’artilhariá pesanta del front de guèrra.
 
Mas lo ministre ucraïnés dels afars estrangièrs, Pavlo Klimkin, considèra que l’escalada de violéncia actuala es responsabilitat dels independentistas pròrusses e del Cremlin, que l’acusa a el de voler renegociar los tèrmes de l’acòrdi qu’en setembre passat foguèt signat a Minsk (Bielorussia) per las partidas en conflicte. Segon aquel acòrdi, caliá observar una alta al fuòc permanenta e establir una zòna de separacion de 30 quilomètres de larg sul front de guèrra. Aquelas mesuras son pas estadas implementadas.
 
 
 
 
 
 

---

Aquesta nòva es adaptada de Nationalia amb qui Jornalet a un acòrdi de collaboracion.