Pascale Bòsc es una artista occitana que residís a Santa Fe de Grefuèlha, un petit vilatge de Lauragués, regularament breçat pel vent d’autan. Se consagra a las activitats artisticas dempuèi 14 ans, mas plan lèu son interès se portèt sus l’aqüarèla: “l’emplec de l’aiga e dels pigments i es fòrça particular e demanda de voler pas mestrejar sa pintura”
 
E mai s’a pres de corses, per conéisser las tecnicas mai aprigondidas, a fach d’estagis en cò d’aqüarelistas internacionals, dont l’artista catalana Dolors Bolaños qu’es venguda son amiga. A son torn, pendent tota l’annada, dispensa de corses e d’estagis dins son talhièr de Lauragués, dempuèi 7 ans que l’artista parteja amb sos escolans sa passion dins la jòia e la bona umor.
 
Pascale Bòsc es vicepresidenta de l’associacion Aqüarèla en Miègjorn-Pirenèus, qu’a lo sit a Tolosa mas que prepausa d’exposicions dins tota la region. Al delà, Bòsc participa a d’exposicions e de salons internacionals amb d’autres artistas d’Euròpa tota.