La jurada del Festenal de Cinèma de Canas, qu’ongan se debanarà del 13 al 24 de mai, aurà per lo primièr còp de son istòria dos presidents en plaça d’un, los realizaires estatsunidencs Joel e Ethan Coen. Aqueles fraires inseparables qu’an dirigit de filmes coma Barton Fink e Fargo prendràn lo relèu de la neozelandesa Jane Campion.
 
“Sèm plan contents de tornar a Canas”, çò diguèron los fraires, qu’a l’ora d’ara son a enregistrar lor novèl filme Hail Caesar amb George Clooney, Christophe Lambert e Scarlett Johansson. “Canas es un festenal que, dempuèi lo començament de la nòstra carrièra, es totjorn estat important per nosautres. Es un onor, perque sèm pas jamai estats presidents de res”, çò an dich los dos realizaires, en apondent qu’esitaràn pas a exprimir lor vejaire.
 
Per Thierry Frémaux, pòrtavotz del festenal de cinèma, “los Coen encarnan un cinèma d’autor, universal, unic e plen d’originalitat dins lor vision del Mond”.