Human Right Watch (HRW) denoncièt dissabte passat la repression violenta de las protèstas ciutadanas que se debanèron en la Republica Democratica de Còngo (RDC) contra un projècte de lei electorala que reportariá de qualques annadas las eleccions presidencialas de 2016. Segon l’organizacion umanitària, almens 40 personas serián estadas tuadas, del temps que, segon lo govèrn del país, los mòrts son 12. HRW acusa la polícia del país d’aver tirat de còps de fuòc reals contra los manifestants a la capitala, Kinshasa, e a la vila orientala de Goma.

“HRW a confirmat que 36 personas, dont un agent de la polícia, son mòrtas pendent las protèstas a Kinshasa. D’aquelas victimas, las fòrças de seguretat de l’RDC ne tuèron amb de tirs almens 21”, çò ditz l’organizacion dins un comunicat. Quatre autras personas foguèron tuadas dins las manfestacions de Goma. De mai, HRW a documentat de cases que los soldats de la Gàrdia Republicana retirèron de cadavres per amagar las evidéncias de las mòrts. E, encara segon los activistas umanitaris, la Gàrdia Republicana tirèt de faiçon indiscriminada dins un espital, en ferissent grèvament tres personas. Ida Sawyer, cercaira e avocata de l’organizacion dins aquel país african, assegurèt a l’Agéncia EFE que “lo govèrn de l’RCD a emplegat una fòrça illegala e excessiva per n’acabar amb las protèstas”. “Cal permetre als ciutadans d’exprimir lors vejaires de manièra pacifica sens paur d’èsser assassinats o arrestats”, çò apondèt.
 
L’origina de las protèstas es un emendament a la lei electorala ont restacan un recensament de la populacion, çò que reportariá de qualques annadas l’eleccion presidenciala, prevista per 2016. L’oposicion e d’activistas denoncièron qu’aquela nòrma èra qu’una manòbra del president per prolongar son mandat, pr’amor que la constitucion del país l’empedís d’aspirar a un tresen mandat.
 
Las manifestacions comencèron diluns passat a la capitala del país e s’estendèron puèi dins d’autras grandas vilas del país. Lo ser precedent, las fòrças de l’òrdre avián retengut los caps de l’oposicion dins las sedenças de lors partits a Kinshasa, e qualques unes d’eles foguèron arrestats, a la capitala e tanben a Goma.
 
Dimars de matin, las autoritats talhèron l’accès a Internet e los SMS dels telefòns mobils, segon lo rapòrt d’HRW.
 
Fin finala, divendres passat, lo Senat acceptèt de retirar l’emendament de la nòrma electorala, en esclarzissent que la celebracion de las presidencialas serà pas ligada a la finalizacion del recensament e que se respectarà la data qu’èra prevista incialament.
 
Joseph Kabila venguèt president en 2001, après la mòrt del sieu paire, Laurent-Désiré Kabila, que foguèt assassinat per un gardacòrs. A ganhat las doas eleccions presidencialas que se son debanadas fins ara, en 2006 e en 2011.