Aqueste dissabte de vèspre, a l’Estadi Domèc de Carcassona, lo vent bufava e fasiá un freg que pelava. La formacion audenca dels juniors tenguèt cap als U19 Dragonets: 30-29 pels catalans. Aquí, aprèp un torn de pista dels enfants de las escòlas de rugbi d’Aude, arribèron dos cavalièrs “catars”, un amb la bandièra occitana e l’autre amb la senyera catalana. Lo Cristian Almerge i anèt d’un Se Canta a capella, del temps que d’aderents de l’IEO distribuissián a l’entrada de l’estadi lo Lexicòt occitan-francés del balon oval.

E venguèt l’ora de l’afrontament entre los Dracs e los Cavalièrs Catars, seleccion dels melhors jogaires de Carcassona, Lesinhan e Limós. Se vegèt lèu fait la diferéncia de ritme entre Superliga e competicion d’Elèit: tresena minuta, Ben Pomeroy puntèt lo primièr ensag catalan; seisena minuta, Oldfield èra a la recepcion d’un còp de pè a seguir; onzena minuta, veniá al segonda linha Whitehead de marcar; catorzena: lo farfadet Escarré preniá de velocitat la defensa audenca. Un quart d’ora que se jogava e los Dracs menavan ja 24-0: Tomàs Bòsc aviá ensacadas las quatre transformacions. A la 18a, amb un còp de pè inversat de Maime Gressèque, lo limosenc Pau Ivan dobrissiá la marca pels Chivalièrs, mas lo novèl menaire australian dels Dracs, Todd Carney, traucava dos còps la defensa audenca (21a e 26a). A la 35a, lo centre Stacul èra lo primièr sus un còp de pè de Gressèque. La pausa èra fiulada per l’arbitre anglés de Superliga, Tim Roby, sus un avantatge de 34-12 pels Dracs.
 
La pluèja se metèt a tombar finòta, mas los 6000 espectators esperavan lo segond acte que los audencs jogarián amb lo vent favorable. Dins lo segond temps, los Dracs ajustèron quatre novèls ensages, òbras de Garcia (44a), de Cardace (48a), de Casty (66a) e de l’inevitable Escarré tornar (70a). Los Cavalièrs faguèron mòstra d’esperit d’iniciativa e capitèron a marcar dos còps: mercé a Farlow a l’ora de jòc e per Ben Jones just sus la còrna. Marca finala e plan logica: 58-24 pels Dracs. Demorava de seguir un polit espectacle lasèr sus fons musical d’Els Segadors e del Se canta. Nos demòra d’esperar que se prendràn d’autras iniciativas per véser aquela novèla esquipa del malhòt blau a escapulari sang e aur amb debasses irange!
 
Dimenge, Tolosa anèt ganhar a Warrington 26-6 contra una esquipa ont figuravan sèt jogaires regulars de la Superliga . Ara, los Dracs van preparar plan seriosament lo primièr rendètz-vos de la sason: lo divendres 6 de febrièr cò del campion de 2014: Saint Helens.
 
 
La segonda fasa en Elèit
 
La dimenjada marcarà la debuta del la segonda fasa en Elèit. Las doas partidas de la Pola dels Asses se jogaràn dissabte: a las 5 e mièja del vèspre, Tolosa-Lesinhan, e a las 6 e mièja, Carcassona-Dragonets.
 
Dimenge, en pola B, Vilafranca recebrà Palau e Limós esperarà Albi a l’Agulha; en pola C, son programadas las partidas Baó-Avinhon e Vilanuèva-L’Escura d’Albigés.
 
 
 
 
Alan Roch