Qualques jorns après que la region de Kobanê siá estada liberada de l’ocupacion de l’Estat Islamic, son a circular sus Internet de vidèos que mòstran la jòia dels curds que pòdon tornar a l’ostal. Son de vidèos ont se vei de fèstas improvisadas, de danças amb de desenats de personas e de familhas que se retròban après de meses d’exili. Mas aquela jòia se mescla amb la tristor de veire los damatges provocats per la guèrra.
 
Un bon sit per veire de vidèos es la pagina Facebook de l’Unitat de Proteccion Populara (YPG) de las femnas de Curdistan, que Jornalet recomanda aquesta setmana dins sa seccion de Facebook. Ailà se pòt veire de vidèos meses en linha pels quites curds. L’Unitat de Defensa de las Femnas es estada la clau de la victòria, segon çò que rapòrta Vilaweb.
 
L’agéncia AFP es anada sus plaça e dins aqueste vidèo se pòt veire clarament la portada dels incresables damatges. De carrièras entièras plenas de tarcums, d’ostals escrancats, de ferralha, coma se pòt veire dins aqueste autre vidèo d’Euronews.
 
Mas aqueles imatges se mesclam amb lo gaug que se libèra dins de vidèos coma aqueste, ont se vei la jòia dels curds de pertot per la liberacion de la region.