Har crespèras, cruspèths e pescajons. De que sorríder un chicòt…

Diluns 2 de heurèr, qu’es Candelèra. En principi, dens la tradicion crestiana, qu’alucan las candelas en memòria de la presentacion deu Jèsus —qui èra judiu— au Temple, 40 jorns après la soa neishença. Question d’impuretat de la mair segon la lei mosaïca... Normaument los fidèus celèbran lo hèit que “Jèsus es lutz”. Qu’es ua question de fe, hòrt personau, e de practica.
 
A l’òra d’ara, e i a vertadèirament pro de gents qui’s sovienen d’aquera latina Festa Candelarum qui a balhat lo mot Candelèra? Los panissèrs e pastissèrs se’n sovienen, eths. Que saben que, quan es question de’s hartar, lo monde responen “present!” Ne’s pèrden pas las aucas ni las aulhas e, en aqueras setmanas d’ivèrn, de Nadau au Dimars Gras (21/02), en passant per los Reis e aquera Candelèra, que marchan los ahars de la profession.
 
S’entenetz dens las campanhas (e dens las vilas) fregir los bons cruspèths, las bonhas saborosas, las gostosas crespèras o los pescajons coseranés sautant dens las padèras? A mensh d’estar sometut a un regim alimentari rigorós, qu’es un mejan de har enqüèra l’unitat nacionau.
 
 
 
 
Joan Jacme Fénié

---

De legir: De pescajons per la Candelièra

---

Barcelona TV - #aranésòc. Crespèths en classa d'aranés