Aprèp aver dominat lo programa cort dimècres de nuèch, ièr passat a Estocòlme, an trionfat los dos patinaires occitans a l’espròva del programa liure, çò que lor portèt la medalha d’aur d’aquel campionat europèu.
 
Per aquel programa liure, espròva mèstra del patinatge artistic, avián triat lo Concèrt numèro 23 de Mozart que transcendiá lor excelléncia tecnica e artistica. Una emocion esportiva coma se’n vei rarament èra tombada sus l’Ericsson Globe mercés a la frescor e a l’audàcia del jove parelh (19 e 20 ans). Capitèron a seduire tant lo public e los mèdias coma la jurada que los benastruguèt amb una marca generosa de 179,97 ponches.
 
Malgrat que desenant viscan e s’entraïnen en Canadà, tre l’endeman de lor victòria, dins una entrevista a una cadena de TV francesa, los dos campions nòstres, originaris de Clarmont-Ferrand e de Montbreson, manquèron pas de portar lor pensada a lor país d’Auvèrnhe.
 
Totes los agaches son ara virats cap als campionats del mond de Shanghai al mes de març.
 
 
 
 
 TL