Actualitats
Una lei per autorizar lo maridatge omosexual en França se votarà en 2013
Lo govèrn francés a confirmat qu’a aviat, per l’an venent, una lei autorizant lo matrimòni e l’adopcion pels parelhs omosexuals. Aital se complís una de las promessas electoralas de François Hollande pendent la campanha presidenciala.
Una lei qu’autorizarà lo maridatge e l’adopcion pels parelhs del meteis sèxe serà votada dins los primièrs sièis meses de 2012, çò confirmèt divendres passat Dominique Bertinotti, ministra delegada a la Familha.
“Avèm la volontat de realizar aquel engatjament tocant lo matrimòni e l’adopcion per totes —l’engatjament 31 de François Hollande, que figura dins lo sieu calendièr del cambiament— al primièr semèstre de 2013”, çò diguèt Bertinotti al jornal Le Parisien.
“Quitament s’es un pauc long, la lei es lo nòstre engatjament e, o cresi, serà votada en 2013”, apond, en indicant qu’abans de presentar un tèxt al Parlament, lo govèrn aurà de consultar per avís lo Conselh Superior de l’Adopcion e lo Conselh d’Estat.
Lo maridatge omosexual es aprovat per 63% dels ciutadans de la Republica Francesa, d’après un sondatge BVA publicat en genièr passat.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#23 Comptar las talhas sus lo revengut dau cople pusleu que chascun son costat, non qu'es pas capitalista. Viure dins la comunautat de ben tanpauc, non ?
Mas si vòles parlar de capitalisma, echa podem. Te balharai mon opinion sus lo maridatge en generau.
#22 "notadament per çò de la fiscalitat, daus eretatges, echa" Qu'es un discors capitalist aquó, non ?
#21 La meschanta fe (e la morala cripto-religiosa) es de respondre "Per far un enfant, cal un papà e una mamà" quand òm te parla de maridatge e d'adopcion. Lo maridatge servirà mai que mai aus omosexuaus per aver los mesmes drechs que los eteros (notadament per çò de la fiscalitat, daus eretatges, echa). Per adoptar un pitit e mai l'educar coma fau n'i a pas mestier d'un papà e d'una mamà.
#20 "Per far un enfant, cal un papà e una mamà". Ben òc, prova donc lo contari. . . Quala mala fe.
#19 ahaha ! lo còp de la "pensada unenca" ! Manca pus que lo dau lòbby omosexuau !
Per contra, te, emb tos "Per far un enfant, cal un papà e una mamà", "los hétéros son de melhors parents que los omos", ses pas dau tot dins 'na pensada d'autrescòps !
Coneisse pas fòrça coples omosexuaus emb daus pitits, mas ne'n coneisse un, de lesbianas, qu'es familha d'acuelh. Quò vòu dire que los servicis sociaus consideren que vau mielhs que daus pitits sian retirats de lor familha etero per èsser plaçats chas elas, per lor educacion, per lor securitat, echa (an dos pitits a l'annada). Los coples etero o omo son pas melhor o piéger parents. Nimai la familhas monoparentalas. Quò depend de las personas. Mas plaçar daus pitits en dificultat sociala greva dins de las familhas d'acuelh ente n'i a dos papàs o doas mamàs, perque serià mielhs per ilhs e refusar lo drech d'adopcion a quelas familhas, es una ipocrisia monstruosa.
Adonc, ta morala cripto-religiosa, te la po'es gardar !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari