Quand se parla de Quercòrb, se pensa a Josèp Salvat o Andrieu Lagarda, dos grands noms per l’occitanisme. Lo valent Cercle Occitan de Quercòrb perseguís l’òbra. Coma cada annada, dempuèi un momenton, ven de faire aparéisser son Armanac occitan de Quercòrb de 2015.

L’armanac de 2015
 
Es una brava brocadura de format A4. I trobaretz totes los ingredients d’un armanac: lo calendièr amb las fèstas e las lunas, los conselhs per l’òrt, de poèmas e de contes pichons, la vida dels aucèls, d’entresenhas botanicas, de dessenhs amusants, de cançons, de recèptas de cosina d’aicí e d’endacòm mai, de racontes istorics, la vida de las bèstias (lo lop, los manhans…), de jòcs (de mots crosats)... E lo tot, de segur, en lenga nòstra.
 
 
La Cosina de Quercòrb
 
Lo Cercle, en ligason amb la colleccion Vendémias de l’IEO Aude, ven de tornar publicar lo libre de recèptas de Cecília Cuxac (primièra publicacion en 1985).
 
Dins lo prefaci, lo capcosinièr Joan-Claudi Rodríguez escriu:
 
“Nos cal clinar umilament sus aqueste libròt que, plan mai qu’un recuèlh de recèptas, es un vertadièr miralh, reflector de tradicions, de biaisses de viure, de manièras de se noirir. Es pas un cors de gastronomia urbana, mas una vertat espantanta amb las flairas que s’escapan del còl de l’ola ont senhoreja la rosòla. Imaginem sas mans, rufadas pel temps e los trabalhs dels cadajorns d’aquel temps, que faiçonan la redonda rosòla, que balhan forma a aquela farsa faita de «res», mas noiriguièra de generacions de trabalhadors d’aqueste país ont la vida èra pas tant aisida. Plan mercé a vos, Dòna, d’aqueste eiretatge que, sens risc de contradiccion, pren plaça dins las colomnas imaginàrias d’èuros del Bonaür Simple.”
 
Andrieu Lagarda, que s’ocupèt de la primièra edicion, se soveniá:
 
“Lo primièr còp que vegèri la Cecília —aviái alavetz uèit ans— èra per la nòça de ma tanta Justina. A la vièlha albèrga rivelhenca d’En Tomiu, sens s’escapar tròp del repais de fèsta tradicional —de l’immancable bolhon plen de lunas dusca a la pèça montada en passant per una longa teoria de carnufalhas acomodadas de tot biais—, avián plan faitas las causas. Mas per dessús lo remembre d’una longa procession de plats a jamai n’acabar, s’impausa a ma memòria lo de l’ambient gaujós que marquèt aquela granda taulejada. Cecília, la sòr del nòvi, menava lo jòc, impausant a l’amassada dels convidats son gost de l’èime popular e son inagotable estrambòrd.”
 
A vosautres ara de vos congostar e de preparar aquelas recèptas autenticas del terrador, entre los fums dels remembres e los espèrs d’una cosina del país: l’aiga bolhida, las sopas (caulets, favas, cebas, coja, galina), la rosòla, lo milhàs de grais, lo polet a l’ast, lo lapin al carrelet, las tripas, l’adòba, la merluça a la quartairòla, lo fricòt de cagarròts, lo tomatat, los camparòls farcits, las aurelhetas, los cocons de pomas, lo tonhòl, las confituras e gelarèas (colindrons, prunas, figas, amoras, codonhs, garravas)... A taula!
 
 
Milhàs-lectura
 
Per marcar al sortida del libre, lo Cercle Occitan de Quercòrb vos convida lo dissabte 21 de febrièr de 2015 a una serada a l’entorn del milhàs, a comptar de 6 oras del vèspre jol cobèrt de Rivelh: lectura de recèptas, Vin de l’amistat e milhàs preparat sus plaça. Inscripcion desirada abans lo 17 de febrièr (telefòn: 04 68 69 27 87 / 04 68 20 81 77; participacion liura; fasètz seguir sieta, forqueta, cotèl...).
 
 
 
 
Ostal Sirventés
 
 
 
 

---

— L’Armanac: 10 èuros (+ 1,50 èuro de mandadís), se pòt comandar: IEO Aude, BP 105, 11022 Carcassona Cedèx
 
— La Cosina: un libre de 64 paginas, 12 èuros (+ 1,50 èuro de despensas de mandadís), de comandar a: IEO Aude, BP 105, 11022 Carcassona Cedèx
 
— L’Armanac + La Cosina: 22 èuros franc de pòrt.