Ven tot bèl just d’espelir a las Edicions dels Regionalismes la version occitana del libre de Francés Fontan que marquèt lo començament del Partit de la Nacion Occitana

En 1960, un desconegut, Francés Fontan, faguèt publicar un libròt amb un títol enigmatic: Etnisme, cap a un nacionalisme umanista. I explicava que la lenga es l’indici sintetic de la nacion. Que pertot ont i a una lenga parlada sus un territòri donat, i a una nacion e que cada nacion a drech a son estat independent pròpri. Aquela doctrina novèla, l’intellectual de tria, tot ben que foguèsse estat un autodidacte complet, l’apelava “etnisme” per referéncia al mot grèc ethnos que significa “pòble” o “nacion”. L’etnisme tornava dessenhar la mapa del Mond en contestant los estats-nacions artificials per los remplaçar per d’estats correspondent a de nacions que lors frontièras serián etnolingüisticas e non pas la resulta d’imperialismes guerrièrs. Un an abans, Francés Fontan aviá creat lo Partit Nacionalista Occitan vengut ara Partit de la Nacion Occitana, que sa tòca èra justament l’independéncia d’Occitània.
 
Mai de 50 ans puèi, l’etnisme, segon sos partisans, es mai que jamai d’actualitat e representa l’avenir. Pasmens, lo libre presenta tanben una analisi dels rapòrts novèls de promòure entre nacions, entre òmes e femnas, entre classas d’atge e entre classas socialas. Es un projècte per una societat de libertat e d’amor. Aquí n’avètz la primièra revirada en lenga d’òc, deguda a Sèrgi Viaule.
 
Francés Fontan nasquèt a París (1929-1979). Visquèt un moment a Niça puèi, en 1964, se refugièt dins las Valadas Occitanas de l’estat italian ont contunhèt lo sieu trabalh de recèrca sus la politica, las lengas e las societats. Foguèt espitalizat a Coni en decembre de 1979. Aquel mes moriguèt d’una congestion cerebrala.
 
 
 
 
 

---

FONTAN, Francés, 2015, Etnisme, de cap a un nacionalisme umanista, Edicions dels Regionalismes, 140 paginas, 13,50 èuros (traduccion de l’original en francés de 1961)
 
Se pòr comandar a Edicions dels Regionalismes, 48 b, rue Gâte-Grenier, 17160 Cressé; telefòn: +33(0)5 46 32 16 94.