L’origina de la proïbicion ven de 2004, quand la cambra legislativa californiana votèt la proïbicion de la produccion e del consume del fetge gras en adusent que l’engraissament de las aucas pòt èsser considerat coma un maltractament o una tortura contra los animals, çò qu’es un delicte en Califòrnia. Ça que la, e davant lo prejudici evident que la decision causava als productors e als importaires, se concediguèt una moratòria de uèch ans abans d’intrar en vigor. Pendent aquel temps, segon los legisladors, los productors podián ensajar de nòus sistèmas mens agressius per far engraissar los fetges dels animals, mas davant la manca de resultats la proïbicion es, fin finala, intrada en vigor.
 
Entre los damatjats i a, sustot, los productors occitans, los qu’an ja demandat l’intervencion de las autoritats francesas. E mai se lo govèrn de París a reagit amb prudéncia, d’autres an optat per prene de mesuras drasticas. Es lo cas del president del Conselh General de Gers, lo socialista Philippe Martin, qu’a fach una crida als sieus conciutadans e als restaurants armanhaqueses per que fagan un boicòt comercial dels vins californians.
 
Las vendas de fetges grasses occitans en Califòrnia son plan petitas, mas los productors planhon lo mal qu’aquela decision causa a l’imatge del fetge gras pertot dins lo Mond. Per aquò los productors prepausan, al delà de demandar l’empara de París, la possibilitat de presentar un recors a Los Angeles contra la proïbicion. Segon lo Comitat Interprofessional del Fetge Gras, los legisladors californians an agit jos la “pression” de las organizacions de defensa dels dreches dels animals.
 
Malgrat que qualques productors an reagit amb de proclamacions ridiculas e amb un ton nacionalista francés marcat, d’autres, coma lo president de la region de Miègjorn-Pirenèus, an pres lo còp amb mai de sens de l’umor. Dins aquel sens, lo tanben socialista Martin Malvy a convidat totes los californians que vòlgan, en començant pel sieu governador, a vesitar la region e a tastar tot lo fetge gras que desiren.