De la fin de febrièr a la fin de març, entre Mar Nòstra, Montanha Negra e riu d’Aude, raja la lenga d’òc dins qualques manifestacions bèlas.

Fasètz la Lenga en Cabardés, edicion de 2015
 
Del diluns 23 de febrièr al dissabte 7 de març, Cabardés va refofar un còp de mai (lo primièr èra en 1996) d’animacions e espectacles occitans entre Argon e Vilagalhenc, Puègnautièr, Mossolens e Ventenac. Una mòstra de la diversitat de l’expression artistica occitana de l’ora d’ara dins un esperit de frairesa, l’afirmacion d’una identitat dins la dobertura a una cultura plurala.
 
Aquò començarà diluns 23 a Argon, amb l’estrena d’un òrt de plantas ancianas, L’Òrt del Castrum, e las prestacions de la corala Cossí que siague e de la contaira peiregòrda Monica Burg (que passarà tanben entre lo diluns e lo dimècres dins las escòlas dels 5 vilatges concernits). Aquò contunharà dimècres 25 a Mossolens, amb l’espectacle d’Arnaud Cance del nom dubitatiu de Saique benlèu (qui sap çò que pòt advenir?) amb de creacions personalas. Divendres 27, a Puègnautièr, se farà un rescontre de musicas d’Orient (Bijan Chemirani) e d’en çò nòstre (Guilhèm López): De vent dins la pèl. Dissabte 28, a Ventenac (de Cabardés, segur), TIO-La Rampa balharà una representacion deMolière d’Òc: una adaptacion en occitan de la pèça Monsieur de Pourceaugnac, mas capvirada per Marcèu Esquieu. Òm se trufa pas mai del lemosin montat a la capitala, mas del parisenc davalat en Occitània e que se’n crei.
 
Un dimenge plan-planet a Vilagalhenc, amb de matin la possibilitat de prene part al talhièr de cosina de Mirèlha Braç e, de vèspre, una passejada menada per l’associacion Patrimònis-Vals de Cabardés.
 
Dimars 3 de març, lo Florian Vernet parlarà a Argon dels mots passats de l’occitan al francés mas que los redactors de diccionaris te fan venir del castelhan, de l’italian, del francés vièlh o del latin (es tan dangierós de dire occitan?).
 
Dimècres 4, Mans de Bruèis [Mans de Breish] e sos collègas del Buthus Occitanus partiràn en guèrra bartassièra a Ventenac de Cabardés.
 
Divendres 6, a Mossolens, vendrà lo moment esperat de la taulejada (amb sa blanqueta —lo plat— e sas aurelhetas; es imperatiu de se marcar abans lo 4 (telefòn: 04 68 77 11 90) e lo temps de balèti per afavorir la digestion.
 
E, fin supèrba, lo dissabte 7 de març, dins la sala polivalenta de Vilagalhenc, amb lo grop La Talvera que cantarà sos darrièrs tèxtes (CD Solelh, solelhaire, sortit en fin d’an) abans de menar lo mond dins un grand balèti final.
 
Qualques seradas se dobrisson per de talhièrs de lenga a las 6 e mièja del vèspre per rescontrar los actors del ser o charrar a l’entorn de la problematica occitana.
 
Es de notar que l’associacion Fasètz la Lenga en Cabardés, sòcia de l’Institut d’Estudis Occitans, anima tanben lo grop vocal Cossí que Siague, organiza cada mes un rendètz-vos de discussion en occitan L’Estanquet d’Argon, met en plaça un viatge cultural a la tardor (en Cevenas en 2014; projècte en cors d’elaboracion per 2015), a pres part a las darrièras Mòstras del Cinèma Occitan, etc.
 
Per ne saber mai, vos cal espepissar lo blòg de l’associacion.
 
 
La Serada a Narbona
 
De son costat, lo Cercle Occitan de Narbona organiza “La Serada” lo divendres 27 de febrièr al Palais del Trabalh a comptar de las 6 e mièja del vèspre (la dintrada se farà a res non còst).
 
La tòca de la manifestacion es de faire conéisser la diversitat de la creacion musicala occitana, de permetre als dançaires de seguir los ritmes de grops professionals, de favorizar los escambis intergeneracionals e d’assegurar la difusion d’articles occitans (libres, disques, camisetas, bandièras, pegasolets...).
 
Al programa del rendètz-vos d’ongan: la dobertura amb una animacion per Ràdio-Lenga d’Òc-Narbona; a 19h: iniciacion a las danças tradicionalas amb Accordéons nos Violons; 20h30: cants amb las Farfantèlas; 21 h: balèti amb Los Gojats [Los Goiats].
 
Carnaval a Limós
 
A Limós, lo mai long Carnaval de la planeta Tèrra se perseguís fins al 22 de març amb sortidas de bandas per Dimars Gras e cada dissabte e cada dimenge (11h, 16h30 e 22h). Lo dissabte 14, serà consagrat a la recepcion dels carnavals del Mond e l’endeman, totas als bandas viraràn a l’entorn de la plaça de la Republica. Lo jutjament e la cremada clavaràn aquesta edicion de 2015 dins la nuèit del dimenge 22 de març.
 
En genièr, la debuta foguèt retardada de qualques jorns en rason dels murtres a París. Se pausèt la question: faire o pas faire Carnaval? Èra malaisit en nom de la defensa de la libertat d’expression representada pel sosten a Charlie d’interdire Carnaval... Mas, los servicis de l’Educacion Nacionala de Gard (e es benlèu çò mesme endacòm mai) venon, per exemple, d’interdire tot passacarrièra d’enfants de las escòlas per faire Carnaval...
 
Òc en Fèsta a Canet d’Aude
 
A Canet d’Aude, lo festenal Òc en Fèsta vos convida a quatre seradas pels quatre dissabtes del mes de març. Se tendràn a 9 oras de la nuèit dins la Sala de las Fèstas (a 9 oras de la nuèit; entradas a 10 èuros, carta d’abonament a 32 èuros). I poiretz aplaudir lo recital Fats e Fòls d’Eric Fraj e Guilhèm López (dissabte 7), un concèrt de Joanda (dissabte 14), un recital de La Sauze (dissabte 21) e l’espectacle Bana d’Ur [Corne d’Aur’òc] del grop Biscam pas (dissabte 28).
 
 
 
 
Ostal Sirventés