Per la siá 8a edicion lo festenal de cinèma LGBT (Lesbians, Gays, Bi e Trans) de Tolosa, anomenat “Des images aux mots“ s’es debanat del 2 al 8 de febrièr. Dins divèrsas salas de cinèma o de salas d’espectacles, 47 filmes dins tota mena de registres foguèron presentats al public pendent la setmana que durèt lo festenal. Ongan, la programacion s’es volguda fòrça eclectica en prepausar de filmes de pertot arreu lo monde (Estat francés, Itàlia, Estats-Units, Venezuela, Argentina, Alemanha, Paises-Basses, etc.) que sovent non son pas distribuits ençò nòstre.
 
La partida off del festenal prepausava doas mòstras, una exposicion de fòtos de Jana Asenbrennerova titolada “Living unnoticed“ sus la condicion dels LGBT de Congo e tanben una exposicion d’afichas dels filmes presentats ancianament al festenal.
 
L’edicion 2015 a premiat dos filmes. Lo prèmi del public es anat al filme “Lo cèrcle“ (Der Kreis) del director soís Stephan Haupt. Aqueste filme es un docudrama en lenga alemanda que presenta las amors entre un professor e un jove travestit dins lo contèxte de las primièras luchas en Soïssa pel drech dels omosexuals. Ja es estat guierdonat al festenal del filme de Berlin. Lo prèmi de la jurada es anat al filme “Soi tieu“ (Je suis à toi) del bèlga David Lambert. Conta l’istòria de Lucas un prostituat argentin qu’Henri, un fornièr de vilatge, fa venir coma gafet. Lo patron s’enamora de’n Lucas que lo rebufa mentre qu’el s’enamora de l’emplegada de la fornariá.
 
Lo cap-festenal “Des images aux mots” es acabat a Tolosa mas comença tra uèi dins tot Miègjorn-Pirenèus la partida regionala del festenal. Durarà fins al 6 de mars e comptarà 20 presentacions de filmes LGBT dins divèrsas vilas de la region.
 



TL