Lo 24 de mai i aurà en Aran las eleccions municipalas e tanben las del Conselh General d’Aran. Fàcia a aquel doble vòte del país del cap de Garona, ven de se crear una assemblada ciutadana que vòl amassar las esquèrras. Dins aquel sens, s’amassèron dijòus passat un dotzenat de personas amb la tòca de bastir una coalicion de las esquèrras aranesas que pòsca concórrer a l’eleccion del Govèrn d’Aran.
 
“Era idèa ei trencar eth sistèma de decision e trencar damb es dinamiques que dominen era politica aranesa”, çò diguèt a Jornalet Mireia Boya, compausanta d’aquesta assemblada que uèi publica tanben un article d’opinion ont s’explica las rasons e los chepics d’aquel nòu movement aranés.
 
Dins aquel article, Boya definís la politica basica d’aquel collectiu: “Èster atentius de çò que se passe en Aran e des enjòcs qu’es aranesi auem d’encarar en un futur pròche. Parlar deth ben comun, de com desvolopar era Lei que ja auem, de com aprofitar-la entà bastir un país melhor. Deth modèl productiu qu’auem e deth que volem. Planificar a tèrme long, aumplir de contengut uns programes electoraus des partits que son vuets, deishar d’improvisar quan se mane e basar es decisions en dialòg e en acòrd. Campar tath nòrd, tà Occitània, e d’aquiu tà Euròpa”.